मोटरसाइकलया सवारी कर गुलि ?
येँ – सरकारं सवारी साधनया कर अप्वयेकेवं उकियात कयाः सर्वसाधारणय् भ्रम ब्वलंगु दु । छुं न्हि न्ह्यवंनिसें सर्वसाधारण जनताया दथुइ थःपिंसं पुलेमाःगु सवारी साधनया कर बारे चर्चा परिचर्चा जुयाच्वंगु खः । आः १२५ सीसी दुगु मोटर–साइकलया कर जक झिद्वः तका पुलेमाः धकाः हल्ला जुइवं सर्वसाधारण मनूतय्सं आः थःपिंसं गयाच्वनागु मोटरसाइकलया कर गबलें हे मपुलेगु व चले मजुइधुंकाः मोटरसाइकल हे वांछ्वयेगु जुइ धया हःगु दु ।
१२५ सीसी मोटरसाइकल कर जक दँय् झिद्वः पुलेगु तसकं थिकेगु व पुलां जुइधुंकूगु मोटरसाइकलया कर झिद्वः पुलेगु धइगु सितिं ध्यबा पुले थें जुइगु धासें सर्वसाधारण जनतां बरु चले जुयाच्वंगु बाइक वा स्कुटर गुलि तक चले जुइ चले यायेगु व वयां लिपा पुलां जुइवं वांछ्वयेगु तकं तयारी जुयाच्वंगु दु ।
थुकथं जनताया दथुइ भ्रम ब्वलंगुया मू कारण धइगु यातायात व्यवस्था विभागं इलय् हे करया दर सार्वजनिक मयाःगुलिं खः । यातायात व्यवस्था विभागं इलय् करया दर सार्वजनिक यानाः जनतायात थुइकेगु ज्या याःगु खःसा थज्याःगु कथं जनताया दथुइ भ्रम लिसें ग्याः चिकू मब्वलनीगु खः ।
तर थ्वहे झ्वलय् यातायात विभागं धाःसा सवारी साधनया कर बजारय् हल्ला जू थें उलि कर पुलेम्वाःगु खँ धाःगु दु । सरकारं बजेटपाखें सवारी साधनया कर अप्वयेकेवं सर्वसाधारण जनताया दथुइ सवारी कर नं अप्वःगु भ्रम न्यनाच्वंगु धासें बजारय् हल्ला जू थें कर थहां मवंगु खँ धाःगु दु ।
यातायात व्यवस्था विभागं सार्वजनिक याःगु सुचं कथं प्रदेश नम्बर ३ स १२५ सीसी तकाया मोटरसाइकल प्रदेश सरकारयात १६५० व स्थानीय सरकारयात ११०० तका यानाः मुक्कं २७५० तका कर पुलेमाः । अथेहे १२६ निसें २५० सीसी तक २६४० व १७६० तका यानाः मुक्कं ४४०० तका कर पुलेमाः ।
उकथं हे २५१ निसें ४०० सीसी तक ५२८० व ३५२० यानाः मुक्कं ८८०० तका पुलेमाःसा ४०० सीसी स्वयां अप्वः न्ह्याक्व सीसी जूसां १६५०० तका पुलेमाःगु व्यवस्था यानातःगु दु । अथेहे गाडीया कर नं यक्व हे अप्वः धकाः चर्चा जुयाच्वंसां नं चर्चा जुयाच्वं कथं करया दर थहां मवंगु खँ नं यातायात व्यवस्था विभागं जानकारी बिउगु दु ।
LEAVE YOUR COMMENTS