सवारी पास बिना येँय् दुहांवयेमदइगु, पैदल यात्रुतय्त प्रवेश निषेध

येँ – स्वनिगः दुने कोरोना भाइरस (कोभिड-१९)या संक्रमण अप्वया वनेवं थनया अवस्था क्वाःतुकेगु निंतिं सरकारं न्हूगु नियम हःगु दु । न्हूगु नियम कथं आः येँ जिल्ला दुहांवयेत अनिवार्य रुपं सवारी पासया आवश्यकता जुइ । अले पैदल यात्रुतय्त धाःसा येँ जिल्लाय् प्रवेश निषेध याःगु दु ।

कोभिड-१९या संक्रमण रोकथाम व नियन्त्रणयात थप प्रभावकारी दयेकेगु निंतिं थौं च्वंगु जिल्ला सुरक्षा समिति येँया मुँज्यां अज्याःगु निर्णय याःगु खः । येँया मूल सतक, भित्री सतक व गल्ली दुने मनूतय् अनावश्यक भीडभाड मयायेत नं मुँज्यां इनाप याःगु दु । यदि अनावश्यक रुपं भीडभाड यायेगु ज्या याःसा प्रचलित कानून बमोजि कारवाही यायेगु खँ सुरक्षा समितिं धाःगु दु ।

एम्बुलेन्स, शव बाहन, वासः व स्वास्थ्य सामाग्री, औद्योगिक कच्चा पदार्थ व तयारी मालवस्तु, पेट्रोलियम पदार्थ, ग्याँस, खाद्य वस्तु, पशुपंक्षीजन्य आहारा, म्ये, दुकुचा, खा, न्या, तरकारी, फलफूल, निर्माण सामाग्री बाहेकया सवारी साधनयात सवारी पास अनिवार्य रुपं आवश्यक जुइगु खँ समितिया मुँज्यां क्वःछिउगु दु । निर्माण सामाग्री बाहेकया तःधंगु गाडी बहनी ८ बजे निसें सुथय् ६ बजेतक जक चले यायेफइ ।

समितिं थ्वस्वयां न्ह्यः जारी याःगु फुक्कं पास खारेज जूगु खँ धासें थनिंनिसें जारी जुइगु पासया रंग वचुगु जुइगु खँ धाःगु दु ।