मेलम्चीया लः २८ न्हु दुने येँय् हयेगु तयारी

येँ (नेपालभाषा टाइम्स)- नेपाल विद्यार्थी संघ येँय् तत्काल मेलम्चीया लः हयेगु माग यासें विरोध प्रदर्शन याःगु दु । बानेश्वरया पञ्चकुमारी देगलं पिहां वःगु ¥याली आइप्लेक्स मल न्ह्यःने थ्यंकाः सभाय् हिउगु खः । ¥यालीइ वःपिं प्रदर्शनकारीतय्सं ‘मेलम्चीया लखय् भ्रष्टाचार बन्द या, लखय् राजनीति बन्द या, आश्वासन मखु लः बिउ, मेलम्चीया लः जिमिसं गबले त्वनेगु ?’ धकाः नारा थ्वयेकूगु खः ।

थ्वहे झ्वलय् मेलम्चीया लः येँय् छ्वया हयेगु प्रक्रिया शुरु जूगु खँ खानेपानी मन्त्रालयया सचिव सुरेश आचार्यं कनादीगु दु । वय्कलं मेलम्चीया लः याकनं येँय् छ्वया हयेगु कार्ययोजना लिसें निर्माण व्यवसायी परिचालन यानागु जानकारी नं बियादीगु दु ।

मेलम्ची खानेपानी विकास समितिया प्रवक्ता राजेन्द्रप्रसाद पन्तं नं थौंकन्हय् निगू सिफ्टय् जनशक्ति परिचालन यानाः आः वइगु २८ न्हुया दुने स्वनिगलय् लः हयेगु कथं निर्माण व्यवसायी सिनो हाइड्रोलिसे समझदारी पतिइ हस्ताक्षर जूगु खँ कनादीगु दु ।

लः अभाव जुयाः स्वनिगःया थीथी थासय् च्वंपिंसं उपत्यका संघर्ष समिति स्वनाः खालीगु घः व बाल्टी सहित प्रदर्शन यायेवं वंगु मंगलवाः खानेपानी मन्त्रालयया सचिव आचार्यया अध्यक्षताय् मेलम्ची खानेपानी विकास समितिया बैठक च्वंगु खः । उगु बैठकं निर्माण व्यवसायी सिनो हाइड्रोपाखें तत्काल ज्या न्ह्याकेगु निर्णय याःगु खःसा सहमति कथं सिनो हाइड्रो म्हिगःनिसें हे साइटय् परिचालन जुइधुंकूगु खँ नं प्रवक्ता पन्तं कनादीगु दु । मेलम्चीपाखें न्हिं १७ करोड लिटर लः स्वनिगलय् छ्वया हइगु खः ।