लः ट्यांकरय् ढुवानी कर मकायेत इनाप

येँ – स्वनिगःया स्थायीय सरकारं ट्यांकर पाखें लः ढुवानी यानाच्वंगुलिं कायेत्यंगु कर चिइकेत माग याःगु दु । स्वनिगलय् लः ढुवानी यानाच्वंगु ट्यांकर व्यवसायीतय्सं सोमवाः छगू पत्रकार सम्मेलन यासें स्थानीय सरकारं कायेत्यंगु कर मकायेत इनाप याःगु खः । कर चिइकेबीगु निंतिं ट्यांकर व्यवसायीतय्सं छगू मंकाः संघर्ष समिति हे दयेकाः ढुवानी कर चिइकेबीगु निंतिं संघर्ष यानाच्वंगु दु ।

संघर्ष समितिया संयोजक उज्ज्वल शाक्यं पत्रकार सम्मेलनय् न्ववासें ट्यांकर व्यवसायीतय्सं व्यवसायी कर व आयकर बुझे यानाच्वंगु अवस्थाय् हाकनं मेगु थीथी नामं कार काये दइमखु धासें थज्याःगु करं उपभोक्तातय्त मार लाइगु व व्यवसायय् नं लिच्वः लाइगु खँ धयादीगु दु ।

पत्रकार सम्मेलनय् उद्यमीतय् भावना बुझे मजुसे कर जक कायेगुयात धाःसा फुक्क धयाथें उद्योग बन्द जूवनीगु अवस्थाय् वइगु खँ नं धाःगु खः । स्थानीय सरकारं काइगु थज्याःगु करया भार फुक्क उपभोक्तायात हे लाःवनीगु जूगुलिं व्यवसायीतय्सं कर मकायेत इनाप यानाच्वंगु खः ।

चालु आर्थिक दँ निसें स्वनिगःया स्थानीय सरकारं छगः ट्यांकरं स्वसः निसें न्यासः तका तक ढुवानी कर कयाच्वंगु खँ व्यवसायीतय्सं धाःगु दु । थौंकन्हय् स्वनिगलय् जक न्हय्सःगः ट्यांकर–तय्सं न्हि ५ करोड लिटर लः वितरण यानाच्वंगु खँ नं पत्रकार सम्मेलनय् जानकारी बिउगु खः ।