सुरुङ मार्ग दयेकेत खुगू कम्पनीया आवेदन

येँ – नागढुंगा–नौबिसे सुरुङ मार्ग दयेकेत खुगू कम्पनीं आवेदन बिउगु दु । सडक विभागया आयोजना कार्यान्वयन महाशाखां सुरुङ मार्ग दयेकेत वंगु साउन २४ गते ग्लोबल टेण्डर आह्वान याःगु खः । बोलपत्रया आह्वानया लिपांगु न्हि तक खुगू कम्पनीं सुरुङ मार्ग दयेकेत बोलपत्र पेश याःगु खः ।

आयोजनाया कथं न्यागू चिनियाँ व छगू जापानी कम्पनीं आवेदन बिउगु खः । आयोजनां आः थुगु कम्पनीया प्रारम्भिक अध्ययन यानाः सर्ट लिस्ट तयार यायेगु खँ धाःगु दु । प्रारम्भिक छनोट लिपा कम्पनीया आर्थिक प्रस्ताव चायेकाः कम्पनी छनोट यायेगु खँ धाःगु दु । आयोजनां सन् २०१९ या जनवरी निसें आयोजना दयेकेगु कथं ज्या यानाच्वंगु दु ।

ठेक्का स्वीकृत जूगु ४२ महिनाया दुने सुरुङ मार्ग दयेकेगु ज्या क्वचाइगु खँ धाःगु दु । नेपालय् न्हापांखुसीं दयेकेत्यंगु सुरुङ मार्गया लम्बाई २.६६८ किलोमिटर जुइ । निगू लेन सुरुङमार्गय् ३.५ व ३.७ मिटरया निगू लेन व १.५ मिटरया इमर्जेन्सी ट्राय्क दइ । सुरुङ मार्गया चौडाइ ९.५ मिटरया जुइसा उचाई ५ मिटरया जुइ ।

सुरुङ निर्माण यायेगु निंतिं येँया २६७ रोपनी जग्गा व धादिङ खण्डय् १०९ रोपनी जमिन अधिग्रहण यायेगु निंतिं सार्वजनिक सूचना पिकाये धुंकूगु दु । आयोजनां वंगु दँय् ७० करोड मुआब्जा इनेधुंकूगु दुसा थुगु दँय् ९० करोड ध्यबा मुआब्जाया निंतिं विनियोजना यानातःगु दु । सुरुङ मार्ग छ्यःगु वापत २५ तका शुल्क कायेगु कथं तयारी यानाच्वंगु दु । सुरुङ मार्ग दयेकेगु निंतिं जापानं पीदँया निंतिं १६ अर्ब २८ करोड तक त्यासा काःगु खः ।