कोरोना महामारी सिधःगु खःला ?

येँ – माघया निगूगु वालंनिसें न्हिं २० हजारया ल्याखय् न्हूपिं संक्रमित पिहां वइ धकाः याःगु अनुमानया अःखः न्हिं १० हजार स्वयां नं म्हो जक संक्रमित पिहां वःगुलिं नेपालय् कोरोनाया संक्रमण म्हो जुया वंगु अनुमान याना हःगु दु ।

देशय् कोरोनाया स्वंगूगु लहर न्यना वनेवं वंगु माघ ६ गते छन्हुं हे १२ हजार ३३८ म्ह संक्रमित पिहां वःगु खः, गुगु आः तकया हे दकलय् अप्वः खः । वयां लिपा थ्व ल्याः थहां वनेगु पलेसा धमाधम कुहां ववं आः न्हिं ३ निसें ४ हजारया जःखः जक थ्यनाच्वंगु दु ।

संक्रमितया ल्याः म्हो जक खने दुसां थ्व सम्बन्धी विज्ञतय्सं धाःसा स्वनिगः दुने ८० प्रतिशत मनूत संक्रमित जूगु दयेमाः धकाः अनुमान याःगु दु । उकिं संक्रमितया ल्याः म्हो जूसां मेगु निवाः तक निं ढुक्क जुइगु अवस्था मदुगु खँ नं धाःगु दु ।

थौंकन्हय् स्वनिगलय् ओमिक्रोनया भेरियन्ट जक चाःहिलाच्वंगु व पुलांगु डेल्टा भेरियन्ट पूरा हे विस्थापित जुइधुंकूगु खँ नं विज्ञतय्सं धाःगु दु । शुरुइ ओमिक्रोन भेरियन्ट तसकं ग्यानापु धाःसां थ्व छक्वलं न्यना वनाः हानं छक्वः म्हो जुया वनीगु जूगुलिं भेरियन्ट जूगुलिं थ्व धुंकाः आः मेगु भेरियन्ट वइ मखुत धइगु नं अनुमान याना हःगु दु ।

ओमिक्रोनं डेल्टा भेरियन्टयात नष्ट याना बीगु जूगुलिं ओमिक्रोनयात कोरोनाया अन्तिम भेरियन्ट जुइमाः धकाः नं विज्ञतय्सं धया हःगु दु । उकिं ओमिक्रोनयात विज्ञतय्सं प्याण्डेमिक मखु ‘एण्डेमिक’ खः धकाः नं धयाहःगु दु । थ्व भेरियन्ट लिपा कोरोनाया महामारी सिधइगु नं अनुमान जुयाच्वंगु दु ।

संक्रमितया ल्याः छाय् म्हो जुल ?
— छखा छेँय् भ्वछिसितं हे संक्रमण जूसां छम्हेस्यां जक परीक्षण यायेगु प्रवृत्ति । छम्हेसित पोजिटिभ पिहां वल धाःसा मेपिंत नं सरे जुल जुइ धकाः अनुमान यानाः आइसोलेसनय् च्वनीपिं यक्व दु ।

— कोरोनाया न्हूगु भेरियन्ट व सेखंमुसुया लक्षण छगू हे खने दुगुलिं अप्वःसां ओमिक्रोनयात नं सामान्य सेखं थें जक तायेकाः परीक्षण हे मयासे च्वंगु खनेदु ।

— थौंकन्हय् छेँय् हे च्वनाः कोरोनाया परीक्षण यायेगु किट्स बजारय् पिहां वःगु दु । अज्याःगु किट्सपाखें परीक्षण यानाः पिहां वःगु लिच्वः सरकारी रेकर्डय् समावेश मजू । उकिं संक्रमित अप्वः दुसां ल्याः कम खने दुगु जुइमाः ।

— अथे हे अप्वःसिनं सरकारं निर्धारण यानातःगु स्वास्थ्य केन्द्र बाहेक मेमेगु थासय् नं परीक्षण यानाच्वंगु खनेदु, थुकिया तथ्यांक नं सरकारी रेकर्डय् दुहां मवः ।

— ओमिक्रोमया संक्रमण ब्वलनेवं मनूतय्गु चहलपहल तुरुन्त हे म्हो जुल । स्कुल, कलेज, हल, भ्वय्, सभा, समारोह आदि बन्द जुइवं मनूतय्गु चहलपहल यक्व हे म्हो जुल, थुकिं यानाः नं संक्रमितया ल्याः म्हो जूगु खनेदु ।