रोनाल्डोया विश्वकपय् न्हापांगु ह्याट्रिक, स्पेनयात बराबरीइ पन

विश्वकप फुटबलय् पोर्चुगलया क्रिष्टियानो रोनाल्डों न्हापांगु ह्याट्रिक याःगु दु । रुसय् जुयाच्वंगु विश्वकप फुटबल–२०१८ समुह ‘बी’ अन्तर्गत वंगु चान्हय् लिबाक जूगु कासाय् रोनाल्डोया ह्याट्रिकया ग्वाहालिं पूर्व विजेता स्पेनयात बराबरीइ पन ।
शनिवाः चान्हय् जूगु कासाय् पोर्चुगल व स्पेनं ३–३ गोलया बराबरी म्हितूगु खः । पोर्चुगलया कप्तान तकं जुयाच्वंम्ह रोनाल्डों जारी विश्वकपय् न्हापांगु ह्याट्रिक याःगु कासाय् स्पेनया निंतिं डिएगो कोस्टां नं निगू गोल याःगु खः ।
कासाय् पोर्चुगलं निक्वःतक अग्रता काःगु खःसां वयात कायम याना तये मफयेवं अंक इना कायेत बाध्य जुल । कासा शुरु जूगु ४ औं मिनेटय् रोनाल्डोयात डी बक्स दुने फाउल प्रहार यायेवं प्राप्त पेनाल्टीयात सही सदुपयोग यासें रोनाल्डो गोल यानाः पोर्चुगलयात अग्रता बिउगु खः ।
वयां लिपा डी बक्स दुनें हे स्पेनया डिएगो कोस्टां प्रहारं याःगु बलं पोस्टया सही दिशा कायेवं कासा १–१ गोलया बराबरीइ वःगु खः । न्हापांगु हाफया हे ४४ औं मिनेटय् रोनाल्डों थप छगू गोल यायेवं पोर्चुगलं २–१या अग्रता काल ।
निगूगु हाफया ५५ औं मिनेटय् कोस्टां गोल यासें कासायात हाकनं बराबरीइ हःगु खः । वयां स्वंगू मिनेट लिपा हे स्पेनया नाचोया गोलं स्पेनं कासाय् न्हापांखुसी अग्रता काल । कासा क्वचाये स्वंगू मिनेट ल्यं दुगु इलय् डी बक्स पिनें प्रहार याःगु फ्रिकिकय् गोल यासें रोनाल्डों व्यक्तिगत स्वंगूगु गोल यानाः जारी विश्वकपय न्हापांगु ह्याट्रिक पूवंकूगु जक मखु पराजयपाखें नं बचे यायेत सफल जुल ।