पाटन संग्रहालयय् अडियो भिजुअल कक्ष
यल- यल महानगरपालिकाया मेयर चिरिबाबु महर्जनं पाटन संग्रहालय दुने पुरातात्विक क्यब दयेकेगु निंतिं महानगरपालिकां माःगु बजेटया व्यवस्था यानाबीगु खँ धयादीगु दु । पाटन संग्रहालयया नीछक्वःगु बुन्हिया लसताय् जूगु ज्याझ्वलय् न्ववानादिसें वय्कलं धयादीगु दु, ‘यदि संस्कृति मन्त्रालयं पाटन संग्रहालय दुने पुरातात्विक क्यब दयेकेगु निर्णय यात धाःसा महानगरपालिकां माःगु बजेटया व्यवस्था यायेगु जुइ ।’
अथेहे वय्कलं यलया मूर्त अमूर्त संस्कृति संरक्षणया निंतिं ज्या याना वयाच्वनागु खँ कनादिसें थ्व ज्यायात निरन्तर याना वनेगु खँ नं धयादीगु खः ।
थ्वयां न्ह्यव न्ववानादिसें वाङ्मय शताब्दी पुरुष सत्यमोहन जोशीं थः पुरातत्व विभागया निर्देशक जुयागु इलय् हे थन पुरातात्विक क्यब दयेकेगु निर्णय यानातयागु खःसां छुं नं सरकारं वास्ता मयाःगु धासें आः संघीय गणतान्त्रिक सरकार वयेधुंकाः थन पुरातात्विक क्यब दयेकेगु खँय् ध्यान बीमाःगु खँ धयादीगु खः ।
स्वनिगःन्यंकं थीथी थासय् उत्खननया झ्वलय् यक्व हे पुलां पुलांगु मूर्तित लुया वयाच्वंगु दु । थज्याःगु मूर्तित तयाः भण्डारखाल क्यबय् पुरातात्विक क्यब दयेकेमाःगु खँ शताब्दीपुरुष जोशीं धयादीगु खः । थ्व संग्रहालय एशियाया हे छगू न्ह्यथनेबहःगु संग्रहालय जुयाच्वंगु खँ नं वय्कलं न्ह्यथनादिल । ज्याझ्वलय् न्ववासें संस्कृति मन्त्रालयया सचिव कृष्णप्रसाद दे
वकोटां पाटन संग्रहालय दुने पुरातात्विक क्यब दयेकेगु निंतिं थम्ह ंमाःगु पहल यायेगु खँ कनादिल ।
थ्वयां न्ह्यः शताब्दीपुरुष जोशी, मेयर महर्जन, सचिव देवकोटा व पुरातत्व विभागया महानिर्देशक भेषनारायण दाहालं मंकाः कथं पाटन संग्रहालयं पिथंगु जर्नल विमोचन यानादीगु खः । अथेहे संग्रहालय दुने अष्ट्रियन डेभलपमेन्ट एजेन्सीं तया बिउगु सौर्यऊर्जा प्यानलया उलेज्या याःगु खः । आः संग्रहालय दुनेया फुक्क प्रदर्शन कक्ष सौर्य ऊर्जापाखें जक संचालन जुइगु खँ धाःगु दु ।
संग्रहालयया २१ क्वःगु बुन्हिया हे झ्वलय् लाकाः मू चुकय् अडियो भिजुएल कक्ष नं संचालनय् हःगु दु । काठमाडौं उपत्यका संरक्षण कोषया ग्वाहालिं स्वंगः प्रोजेक्टर तयाः थ्व कक्ष संचालनय् हःगु खः । थ्व भिजुएल कक्षय् फिलिडेपा म्युजियमय् संग्रह यानातःगु निसःदँ न्ह्यःया नेपाःया पौभाः कलाया उत्कृष्ट नमूना प्रदर्शन यानातःगु दु । थ्व पौभाः किपाय् उबलय् सिलु तीर्थ यात्राया सन्दर्भ बियातःगु दु ।
पाटन संग्रहालय विकास समितिया सदस्य सचिव सुरेश लाखें थुगु कक्षया संकलनय् स्वनिगःया अमूर्त सम्पदात दुथ्याका यंकेगु खँ धयादीगु दु ।
LEAVE YOUR COMMENTS