लुँवहःया भाः कुहां वयेवं नेपाःया लुँवहः बजाः नं प्रभावित

येँ (नेपालभाषा टाइम्स)- वंगु छवाः न्ह्यवंनिसें अन्तर्राष्ट्रिय लुँ वहः बजारय् लुँ वहया भाः कुहां वयेवं उकिया लिच्वः नेपाःया बजारय् नं लाःगु दु ।
म्हिगः नेपाःया लुँ वहः बजारय् लुँ तोलां च्यासः तका कुहां वःगु खःसा वहः तोलां १५ तका कुहां वःगु खः । म्हिगः व म्हीग नेपाःया बजारय् लुँ तोलां १ लाख ११ हजार २०० तका कायम जूगु खःसा वहः तोलां १ हजार ३८५ तकां कारोबार जूगु खः ।

अन्तर्राष्ट्रिय लुँ वहः बजारय् लुँ मीपिनिगु ल्याः अप्वया वनेवं लुँया भाः कुहां वःगु खः । उकथं हे अमेरिकी डलर बल्लायेवं उकिया लिच्वः नं लुँया बजारय् लाःगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्यं ‘नेपालभाषा टाइम्स’ यात कनादीगु दु ।

वय्कःया कथं थौंकन्हय् अन्तर्राष्ट्रिय शेयर मार्केट नं भाः कुहां वयाच्वंगुलिं यानाः डलरया भाः थहां वनाः नं उकिया लिच्वः लुँया बजारय् लाःगु खः । विश्व अर्थतन्त्रय् डलर मजबुत जुइवं लुँया भाः कुहां वयेगु याः । वंगु छुं न्हि न्ह्यः प्रति डलर १ सय ३३ तका ३५ पैसा तका कायम जूगु खःसा म्हिगः १३३ तका १५ पैसा कायम जूगु खः ।

विश्लेषक शाक्यया कथं अमेरिकी फेडेरल बैंक व युरोपियन युनियन बैंकया दथुइ मुद्रा स्फीति २ प्रतिशतय् कायम यायेगु सहमतिया कारणं यानाः नं लुँया भाः कुहां वःगु खः । उकथं हे थौंकन्हय् अमेरिकाया लिसें युरोपय् तकं रियल स्टेटया माग नं म्हो जुयाच्वंगु दु ।

नेपालभाषा टाइम्स

च्वमिया मेमेगु

• वतु त्वालय् दन्त शिविर
• पासा पुचः गुथि लन्दनया न्हूधाः
• ज्यापु समाजया निर्वतमान नायः तीर्थलालया अबु मंत
• ‘मौसम पूर्वानुमानयात गम्भीर रुपं मकाःगुलिं यक्व क्षति जूगु खः’ – वरिष्ठ माैसमविद् मणिरत्न शाक्य
• नखःचखःया दिं कायेत झीगु संस्कृतिया मौलिक परम्परा म्हसीकेमाल