ने. सं. ११४४ कछलागा अष्टमी - भैरवाष्टमी

विदेशय् नं पद्म लुमंकल, येँय् झिंस्वन्हु कुन्हु तःजिक बिचाः मुँज्या

येँ – नेवाः न्ह्यलुवा पद्मरत्न तुलाधरया लुमंतिइ देय्या थीथी जिल्ला लगायत विदेशय् तकं बिचाः मुँज्यात याइगु जूगु दु । वय्कःया लुमंतिइ म्हिगः अष्ट्रेलियाय् छगू बिचाः मुँज्या जुल । नेपाल आदिवासी जनजाति महासंघ अष्ट्रेलिया शाखाया ग्वसालय् अनया रकडेल रेलवे परेडय् उगु बिचाः मुँज्या जूगु खः ।

ज्याझ्वलय् अष्ट्रेलियाय् च्वनाच्वंपिं थीथी जनजाति नेतातय्सं भाजु तुलाधर मदयाः नेपाःया आदिवासी जनजाति आन्दोलनय् लाः वंगु लिच्वःया बारे चर्चा याःगु खः । वय्कःयात लुमंकाः झिंनिन्हुया घःसू कुन्हु झापाय् नं बिचाः मुँज्या याइगु जूगु दु । नेवाः देय् दबू झापा जिल्ला समितिपाखें उगु बिचाः मुँज्या यायेत्यंगु खः ।

झापाया नेवाः लिसें थीथी आदिवासी जनजाति न्ह्यलुवातय्सं ब्वति काइगु उगु ज्याझ्वलय् भाजु तुलाधरया बारे दयेका तःगु डकुमेन्ट्री नं क्यनेगु खँ ग्वसाः खलःया दुजः दिनेश शाक्यं कनादिल । वय्कःया लुमंतिइ येँय् तःजिक बिचाः मुँज्या यायेगु नं तयारी जुयाच्वंगु दु । झिंस्वन्हु कुन्हु येँय् तःजिक बिचाः मुँज्या यायेगु लागिं थीथी खलः पुचःया दुजःपिनि दथुइ बैठक जुयाच्वंगु दु ।

बैठकं छगू बिस्कं ग्वसाः पुचः हे स्वनाः बिचाः मुँज्याया तयारी याये फुगु खँ धाःगु दु । थ्वहे झ्वलय् थुगुसी न्हूदँ ११३९ या लसताय् जुइगु थीथी ज्याझ्वलय् भाजु तुलाधर बारे नं चर्चा परिचर्चा यायेगु खँ धाःगु दु । न्हूदँ ज्याझ्वलय् वय्कःयात नं लुमंकेगु कथं ग्वसाः याना वनेगु खँ जूगु दु ।

स्वनिगः दुने थीथी खलः पुचः–तय्सं वय्कःया लुमंतिइ थीथी ज्याझ्वःत याना वनेगु लिसें पिने जिल्लाय् नं नेवाः लगायत आदिवासी जनजाति संस्थातय्सं थीथी ज्याझ्वः याना वनीगु खँ सीदुगु दु ।वंगु म्हपुजा कुन्हु नं न्हूदँ समारोह समितिं मूल ज्याझ्वः स्थगित याःसां ह्याउँनिभाः व शेभ भ्याली पुचःपाखें बसन्तपुली मुनाः ¥याली पिकासें वय्कःयात लुमंकूगु खः ।

सरकारं हुलाक टिकट पिकाइगु
मदुम्ह भाजु तुलाधरया सम्मानय् सरकारं वय्कःया किपा दुगु हुलाक टिकट पिकाइगु खँ सीदुगु दु । न्हूदँ कुन्हु थिमिइ जूगु ज्याझ्वलय् न्ववासें सामान्य प्रशासन मन्त्री लालबाबु पण्डितं थ्व खँ कनादीगु खः । ज्याझ्वलय् मूपाहां कथं न्ववासें वय्कलं सरकारपाखें वय्कःया सम्मानय् हुलाक टिकट पिकायेगु लागिं थम्हं प्रस्ताव यंकेगु बचं अन बियादीगु खः ।