
येँ – सिन्धुपाल्चोकया बलेफी गाउँपालिका–७ स्थित बिन्जेलय् झाडाबान्ता जुयाः न्यय्म्ह स्वयां अप्वः मनू विरामी जूगु दु । छगू हे गांया न्यय्म्ह स्वयां अप्वः विरामी जूगु व गुलिसिया स्थिति गम्भीर जूगु खँ गाउँपालिकाया अध्यक्ष केदार क्षेत्रीं कनादीगु दु । विरामीतय्त खाडिचौरस्थित सिन्धु सदाबहार अस्पताल व स्थानीय मेडिकलय् वासः याकाच्वंगु दु ।
छक्वलं अप्वः मनू विरामी जूगुलिं छगू हे बेडय् स्वम्ह तक तयाः वासः याये मालाच्वंगु दु । विरामी जूपिं फुक्कं हे भुजेल समुदाययापिं खः ।
वंगु शुक्रवाः स्थानीय गोपीकृष्ण भुजेलया म्ह्याय्या इहिपा जूगु खः । उगु हे इहिपा भ्वजय् भ्वय्े नया वःपिं सकलें झाडावान्तां कःगु खः । विषाक्त नसा नःगुलिं प्रकोप न्यनावंगु खँ चिकित्सकतय्सं धाःगु दु ।
झाडाबान्ताया कारणं विरामी जूपिनिगु स्वास्थ्य सुधार जुयाच्वंगु दुसा गुलिखे गम्भीर अवस्थाय् दु । गामं विरामीयात अस्पताल यंकेगु क्रम जारी जुयाच्वंगु खँ धाःगु दु । गम्भीर विरामीया थप वासः यायेगु निंतिं धौख्यः व येँय् विरामी हयेगु ज्या नं जुयाच्वंगु खँ धाःगु दु ।
LEAVE YOUR COMMENTS