प्रमाणपत्रय् नां भिंकेत ऐन संशोधन

येँ (नेपालभाषा टाइम्स)- गृह मन्त्रालयया प्रस्ताव कथं सरकारं ‘उमेर, नां व जात भिंकेगु नियम, २०१७ परिमार्जिन यानाः (स्वक्वःगु संशोधन) नियम २०८०’ पारित याःगु दु । शैक्षिक प्रमाणपत्रय् उमेर, नां व जात मिले मजुयाः आपालं विद्यार्थीत मर्काय् लानाच्वंगु दु ।

न्हूगु नियम कथं उमेर, नां व जात भिंकेगु ई न्हापा खुलाया जक दुगु खःसा आः उकियात संशोधन यानाः न्यादँ कायम याःगु दु । गृहमन्त्रीया सचिवालयया उपसचिव वेदनिधि खनालं सहज जुइ कथं व त्रुटि जूगु भिंकेत ई थप यानाः नियम पारित जूगु खँ धयादीगु दु ।

वय्कःया कथं प्रमाणपत्र भिंकेगु बाध्यता दुपिंसं दछिया दुने राष्ट्रिय परीक्षा बोर्डय् दरखास्त बीफइ । न्हूगु ऐनय् धयातःगु दु, ‘सुं नं विद्यार्थीं शैक्षिक प्रमाणपत्र कायेधुंकाः नेपाली नागरिकताया प्रमाणपत्र काःगु वा नागरिकता सम्बन्धी प्रचलित कानुन कथं नेपाली नागरिकताया प्रमाणपत्रय् थःगु वा मां अबुया नां वा थर वा नामथर संशोधन याकूगुलिं उगु कथं एसएलसी, एसइई वा कक्षा १२ या प्रमाणपत्र काःपिं वा नेपाली नागरिकताया प्रमाणपत्रय् विवरण भिंकूगु दछिया दुने दरखास्त बीफइ ।’

तर सुं नं विद्यार्थीं उपनियम प्रारम्भ जुइ न्ह्यः नेपाली नागरिकताया प्रमाणपत्र काःगु वा नेपाली नागरिकताया प्रमाणपत्रय् थः वा मां अबुया नां व थर संशोधन याकूगु खःसा उगु कथं एसएलसी, एसइई वा कक्षा १२ या प्रमाणपत्रय् थःगु व मां अबुया नां व थर भिंकेत न्यादँ स्वयां पुलांगु न्ह्याम्ह व्यक्तिं नं छक्वःया नितिं थ्व उपनियम प्रारम्भ जूगु दछिया दुने दरखास्त बीफइगु व्यवस्था यानातःगु दु । उकथं हे नागरिकता भिंकूगु दछिया दुने शैक्षिक प्रमाणपत्र भिंकेगु नितिं दरखास्त बीफइगु व्यवस्था नं याःगु दु ।