महानगरया स्कुल चायेकेगु बारे अध्ययन

येँ -कोरोना महामारीया जोखिमया दथुइ नं स्वनिगःया स्कुलत धमाधम चायेकेगु याना हःसां येँ महानगरपालिका अन्तर्गतया स्कुलत चायेकेगु वा मचायेकेगु धइगु सवालय् आधिकारिक निर्णय धाःसा अझं वःगु मदुनि ।

म्हिगः येँ मनपा शिक्षा समितिया मुँज्या च्वनाः थुकिया बारे निर्णय यायेत्यंगु खःसां नं सरकारं धयातःगु ‘स्वास्थ्य मापदण्ड’ धाःगु छु खः स्पष्ट मजूगुलिं स्कुल चायेकेगु धकाः आधिकारिक निर्णय याये मफुगु खँ धाःगु दु । सरकारं ‘स्वास्थ्य मापदण्ड पालना यानाः स्कुल चायेकेगु’ धाःगु दुसां उकिया व्याख्या धाःसा स्पष्ट मजूगु खँ बैठकय् पिहां वःगु खः ।

उकिं थुकिया बारे समेत स्पष्ट यानाः निर्णय यायेगु लागिं मुँज्यां शिक्षा विभागया प्रमुख रामप्रसाद सुवेदीया अध्यक्षताय् छगू कार्यदल गठन याःगु दु । कार्यदलयात असोज ४ गते तकया दुने अध्ययन यानाः प्रतिवेदन पेश यायेगु म्याद बिउगु दु । उकिं स्कुल चायेकेगु वा मचायेकेगु धइगु बारे महानगरपालिकाया निर्णय असोज ४ गते जक वये फइगु खँ धाःगु दु ।

अथे खःसां थौंकन्हय् थःथःपिंसं माःगु व्यवस्था यानाः चायेकेधुंकूगु स्कुलत बन्द या धइगु निर्देशन नं शिक्षा समितिं मबिउगु खँ धाःगु दु । मनपापाखें आधिकारिक रुपं निर्णय मयाःनिसां थौंकन्हय् थीथी स्कुलत धाःसा थःपिंसं हे माःकथंया स्वास्थ्य मापदण्ड पालना यासें चायेकाः भौतिक रुपं ब्वंकेगु शुरु याना हयेधुंकूगु दु ।