ने. सं. ११४४ कौलाथ्व चौथी -

कन्हय् पद्मरत्नया राजकीय सम्मानसहित अन्त्येष्टि

येँ नेपालभाषा आन्दोलन लिसें आदिवासी जनजाति आन्दोलन व नेपाःया मानव अधिकार आन्दोलनया न्ह्यलुवा भाजु पद्मरत्न तुलाधर थौं मंत । मस्तिष्कघात जुयाः वंगु शुक्रवाः अन्नपूर्ण न्यूरो अस्पताल व वयां लिपा नर्भिक अस्पतालय् भर्ना जुयादीम्ह भाजु तुलाधर थौं न्हिनय् २ बजे मदुगु खः । कन्हय् न्हिनय् वय्कःया छेँ लाजिम्पाटं शवयात्रा यासें थनया शोभा भगवतीस्थित कर्णदीपय् राजकीय सम्मान सहित वय्कःया अन्तिम संस्कार याइगु जूगु दु ।

वंगु वालय् आकाझाकां ‘स्ट्रोक’ जुयाः अस्पताल भर्ना जुयादीम्ह वय्कलं झिन्हु तक कोमाय् च्वनाः ल्वय्लिसे ल्वानादिल । चिकित्सकतय्सं धाः कथं वंगु शुक्रवाः स्ट्रोक जुयाः वय्कःया करिब बछि मस्तिष्क प्यारालाइज जूगु खःसा उकिया उपचार जुइ मलाःनिवं जँलस्यें (किड्नीं) ज्या यायेगु त्वःतूगु खः । वयां लिपा डायलासिस नं जूगु खः । तर थौं सुथय् छातीइ इन्फेक्सन जुयाः उकिया संक्रमण हि मार्फत शरीरया फुक्क हे अंगय् न्यना वन । फलस्वरुप सेफ्टिमिसिया अर्थात मल्टिपल फेलिएर जुसेंलि नुगःचु, स्वँ आदि शरीरया फुक्क हे अंग बन्द जुयाः वय्कःया निधन जूगु खँ चिकित्सकतय्सं धाःगु दु ।

थौं नर्भिक अस्पतालय् वय्कः मदुगु समाचार वयेवं पुलांम्ह प्रधानमन्त्रीलिसें नेकपा अध्यक्ष पुष्पकमल दाहाल अस्पतालय् हे झायाः वय्कःयात राजकीय सम्मान प्रदान यानाः अन्त्येष्टि यायेगु जानकारी बियादीगु खः ।

मन्त्रिपरिषद्पाखें थ्व बारे निर्णय यानाः वय्कःयात सरकारप्रमुखया रुपय् उपप्रधानलिसें रक्षा मन्त्री इश्वर पोखरेलं नेपाःया राष्ट्रिय ध्वाँय् फायेकेगु व सैनिक टुकडीपाखें सलामी बीगु ज्या जुइ ।

निधन लिपा परिवारया इच्छा कथं वय्कःया शवयात लाजिम्पाटस्थित छेँय् यंकूगु खःसा कन्हय् न्हिनय् १ बजे छेँनं हे शवयात्रा यासें अन्तिम संस्कार यायेगु क्वःछिउगु दु । शवयात्रा लाजिम्पाट, लानिपुखू, कमलाछि, असं, न्हाय्कंत्वाः, थाय्मरु, त्यंगः, क्षेत्रपाटी, जोगिंपाखा, कर्णदीप (शोभा भगवती) जुयाः वनी ।

थौं वय्कःया छेँय् नेपालभाषा आन्दोलनया न्ह्यलुवापिं दुर्गालाल श्रेष्ठ, मल्ल के. सुन्दर लिसें मन्त्री, सांसद, थीथी दलया नेता व भाषिक एवं राजनीतिक कार्यकर्तातय्सं श्रद्धाञ्जलि प्वंकादीगु खः । लत्या न्ह्यः तिनि न्हापांगु ज्याःजंक्वया लसताय् लछियंकं थीथी ज्याझ्वःया यासें वय्कःया नागरिक अभिनन्दन याःगु खः।