संविधान संशोधनय् पहिचानयुक्त प्रदेशया मुद्दा नं दुथ्याकेत माग
येँ – पहिचानय् आधारित संघीय गठबन्धनं आः जुइत्यंगु संविधान संशोधनय् पहिचानयुक्त प्रदेशत स्थापना यायेगु मुद्दा नं दुथ्याकेत माग याःगु दु ।
सरकारं लिपुलेक, लिम्पियाधुरा व कालापानी सहितया न्हूगु नक्सा संविधान संशोधन मार्फत संविधानय् दुथ्याकेत्यंगु खँय् सुभाय् बिउसें राज्य पुनःसंरचना सम्बन्धी थःपिनि माग नं दुथ्याकेत गठबन्धनं माग याःग दु । गठबन्धनय् दुथ्याःगु खूगु घटकतय्सं छगू मंकाः विज्ञप्ति पिथंसें संविधानया धारा २७४ संशोधन यानाः न्हय्गू प्रदेशयात अप्वयेकाः पहिचानयुक्त १०+१या प्रदेशत स्थापना यायेत माग याःगु दु । नापं स्वायत्त, संरक्षित व विशेष क्षेत्रत तत्काल घोषणा यायेत नं माग याःगु दु ।
अथेहे राज्याया हरेक क्षेत्रय् व चुनावय् पूर्ण समानुपाति प्रणाली लागु यायेमाःगु, नेपाःया फुक्क मांभाय्यात गाँ, प्रान्त व केन्द्र तकया फुक्क सरकारी निकाय, लोकसेवा आयोगय् सरकारी कामकाजीया भाय्या मान्यता बीगु कथं संविधान संशोधन यायेत नं गठबन्धनं माग याःगु दु ।
संविधान संशोधन यानाः खश समुदाययात आदिवासी समुदायलय् सूचिकृत यायेत व ३ प्रतिशतया थ्रेसहोल्डया व्यवस्था चीकेत नं माग याःगु दु । गठबन्धन नाप आवद्ध नेपाः राष्ट्रिय पार्टी, खम्बुवान राष्ट्रिय मोर्चा, खशान राष्ट्रिय संघर्ष समिति, नेपाल राष्ट्रिय परिषद, नेपाल लोकतान्त्रिक पार्टी व आदिवासी जनजाति पार्टीपाखें थःपिनिगु मागयात संविधान संशोधन मार्फत संबोधन यायेत माग याःगु खः ।
LEAVE YOUR COMMENTS