फोहर वायेत समस्या, उत्पादन म्हो जक यायेत इनाप

येँ – येँ महानगरपालिका वातावरण विभागया प्रमुख हरिकुमार श्रेष्ठं फोहोर संकलन यायेत समस्या जुयाच्वंगु धासें येँया जनतयात फोहोर उत्पादन म्हो यायेत नं इनाप यानादीगु दु । फोहोर उत्पादन म्हो यानाः वर्तमान इलय् जनतां ग्वाहालि यायेमाः धासें वय्कलं फोहोर म्हो यायेत इनाप नं यानादीगु खः ।

वय्कलं धयादीगु दु, ‘ध्वगिगु फोहोर क्यबय् तयाः ध्वमगिगु फोहोर जक पिने हःसा फोहोर व्यवस्थापन यायेगु ज्याय् ग्वाहालि जुइ ।’ कर्मचारीया अभावं फोहोर संकलन यायेत समस्या जुयाच्वंगु इलय् सिसडोलय् स्थानीय जनतां फोहोर वाके मबियाच्वंगुलिं नं समस्या वयाच्वंगु खँ वय्कलं धयादिल ।

वय्कलं इनाप यानादीगु दु, ‘थज्याःगु संकटया इलय् जनता नं सचेत जुयाः मनपायात फोहोर व्यवस्थापन यायेत ग्वाहालि यायेमाः ।’

सिसडोलय् स्थानीयं म्हिगः सुथय् ८ बजे निसें फोहर वाके मबिउगु खः । वातावरण विभाग प्रमुख श्रेष्ठं चान्हय् ३ बजे जक सिसडोलय् फोहर वायेमाःगु खँ धयादीगु दु । ‘चान्हय् १ बजे कर्माचारी तयार यानाः ३ बजे जक फोहर वायेयंका’ वय्कलं धयादीगु दु ।

(ने. सं. ११४० चौलाथ्व ४ / वि. सं २०७६ चैत १५, शनिवाः)