२०७८या जनगणना प्रविधिमैत्री जुइगु

येँ – प्रत्येक झिदँय् छक्वः देय्या कुल जनसंख्याया लगत काइगु राष्ट्रिय जनगणना कायेत करिब निदँत्याया ई ल्यं दनि । झिदँय् छकः जुइगु जनगणना वइगु २०७८ सालय् जू वनाच्वंगु दु । आः जुइगु जनगणनाय् सूचना प्रविधिया प्रयोग यासें बहप्रविधिमैत्री विधि प्रयोग याइगु जूगु दु ।

राष्ट्रिय अपांग महासंघ नेपालं ग्वसाः ग्वःगु ‘राष्ट्रिय जनगणनाय् अपांगता जूपिं व्यक्तिया सवाल’ विषयय् अन्तक्र्रिया ज्याझ्वलय् आः जुइगु जनगणनाय् वैज्ञानिक प्रविधिया प्रयोग यासें प्रविधिमैत्री यायेगु खँ धाःगु खः । वैज्ञानिक प्रविधिया प्रयोग यासें प्रविधिया विविधताया पहुँचय् समानाया हक स्थापित जुइकथं आः जनगणनाया तथ्यांक संकलन यायेगु जानकारी बिउगु दु ।

वि.सं. १९५८ निसें देय्न्यंकंया कुल जनसंख्याया लगत कायेगु ल्याखं जनगणना कायेगु शुरु जूगु खः । २०६८ सालय् जूगु झिंछक्वःगु जनगणनाकथं नेपाःया कुल जनसंख्या निगू करोड खुगू लाख ९४,५०४ दु । तत्कालीन न्यागू विकास क्षेत्रया ल्याखं उगु इलय् दकलय् अप्वः मध्यमाञ्चलय् ९६,५६,९८५ जनसंख्या दुगु खःसा दकलय् म्हो सुदूर पश्चिमाञ्चल विकास क्षेत्र २५,५२,२१७ जनसंख्या दुगु तथ्यांक विभागया प्रतिवेदनय् न्ह्यथनातःगु दु ।

२०५८ सालया जनगणनाया तुलनाय् २०६८ सालय् ३४,६९,३८६या ल्याखं जनसंख्या अप्वःगु खनेदु । लिपांगु जनगणनाकथं नेपालय् कुल जनसंख्याया २ प्रतिशत अपांगता जूपिं दुगु ज्याझ्वलय् जानकारी बिउगु खः । अथे हे विश्व स्वास्थ्य संगठनया लिपांगु छगू प्रतिवेदनकथं विश्वया कुल जनसंख्याया करिब १५ प्रतिशत मनू अपांगता जूपिं दु ।