प्रदेश ३या सभामुखबारे येँय् सहलह जुइगु

येँ – एमालें प्रदेश नं. ३ य् सुयात सभामुख दयेकेगु धयागु बारे येँ हे च्वनाः सहलह याइगु जूगु दु । म्हिगः हटौंडाय् जूगु प्रदेश सभा ३ या न्हापांगु ऐतिहासिक बैठक लिपा सांसदत फुक्क थःथःगु थासय् लिहां वनेधुंकूगु दु । येँया सांसदत नं येँय् लिहां वयेधुंकूगु दु । म्हिगः जूगु न्हापांगु बैठकं वइगु माघ २७ गते प्रदेश सभाया सभामुख ल्ययेगु क्वःछिउगु खः । आः सभामुखया निंतिं येँय् हे च्वनाः सहलह जुइगु खँ सांसद राजेश शाक्यं धयादीगु दु ।

‘बैठक लिपा दक्वं लिहां वनेधुंकूगु दु, आः येँय् हे च्वनाः सभामुख सुयात दयेकेगु धयागु बारे सहलह जुइ’ सांसद शाक्यं धयादीगु दु । प्रदेश ३ य् एमालेया बहुमत दुगु ल्याखं थन एमालेया हे सभामुख जुइगु पक्का दु । अथेहे मुख्यमन्त्री नं एमालेपाखें हे जुइ । उपसभामुख छगू माओवादी केन्द्रयात वनीगु जुइ । उपसभामुखया चुनाव धाःसा माघ २८ गते जुइ । प्रदेशसभा म्हिगः च्वंगु बैठकं प्रदेश सभा कार्यसञ्चालन अन्तरिम कार्यविधि, २०७४ नं सर्वसम्मतिं पारित याःगु खः ।

न्हापांगु बैठक ज्याथम्ह सांसदया ल्याखं ७२ दँ दुम्ह डोरमणि पौडेलं प्रदेश प्रमुख अनुराधा कोइरालां प्रदेशसभाया बैठक आह्वान यानादीगु पत्र ब्वनाः न्यंकुसें बैठक सुरु यानादीगु खः । वयां लिपा बैठकं प्रदेशसभा कार्यसंचालन सम्बन्धी नियमावली मदयेकूतले प्रदेश कार्य संचालन अन्तरिम कार्यविधि पारित याःगु खः । अथे हे सभामुख व उपसभामुखया निर्वाचन मजूतलेया निंतिं कार्यसंचालनया निंतिं रामेश्वर फुयाँल, घनश्याम दाहाल, गीता वाग्ले व शोभा शाक्य दुथ्याःगु छगू समिति नं गठन याःगु दु ।