ने. सं. ११४४ कौलाथ्व पारू - नःलास्वनेगु

स्वम्ह नेवाः मिसा हस्तीपिंत हना

येँ (नेपालभाषा टाइम्स)- देय्या थीथी ख्यलय् आवद्ध जुयाः उत्कृष्ट सेवा बिया च्वनादीपिं स्वम्ह नेवाः मिसा हस्तीपिंत ‘सेभ नेवाः भ्याली’ पाखें हनेगु ज्या यात । त्रिविविया डिन प्रा.डा. कुसुम शाक्य, वरिष्ठ मानव अधिकारवादी न्ह्यलुवा अंजना शाक्य व नेपाल प्रहरीया भ्याली इन्चार्ज एआईजीपी किरण वज्राचार्ययात खादागां न्ययेकाः दसिपौ लःल्हासें हनेगु ज्या याःगु खः । उगु हे ज्याझ्वलय् सम्पदा अभियन्ता सुरज साय्मि, जनबहाः गुंला बाजं कसाः तःधं गुथिया बाजं गुरु प्रवोध कसाः व कीर्तिपुण्य महाविहार लगंया बाजं गुरु सुमेन्द्र शाक्ययात नं हनेगु ज्या जूगु खः ।

ज्याझ्वलय् नुगःखँ तयेगु झ्वलय् प्रा.डा. कुसुम शाक्यं नेवाःतय् जनसंख्या मेमेगु जातिया तुलनाय् म्हो जुया वंगु व उकी नेवाः भाय् ल्हाइपिं झन् हे म्हो जूगु खँ कँसें चिन्ता प्वंकादिल । हिम राइट् संस्थाया प्रमुख अंजना शाक्यं नेवाःतय् भचा तःधं जुल कि नेवाः भाय् मल्हायेगु चलन दु धासें थुकियात बन्द मयायेगु खःसा ल्हातय् वःगु अधिकार नं छ्यले फइ मखु धयादिल ।

अथे हे एआईजीपी किरण वज्राचार्यं प्रहरी सेवाय् नेवाः मिसापिं द हे मदु धाःसां जिउ धासें यदि मेहनत यात धाःसा नेवाः मिसातय्सं नं प्रहरी थेंज्याःगु गहन जिम्मेवारी पूवंकेफु धइगु दसि थः हे जूगु खँ कनादिल ।
संस्थाया दुजः प्रभात रिमालं नेवाः धइगु जाति जक मखु, थ्व छगू विशिष्ट सभ्यता खः, नेवाःयात सभ्यता धाल धाःसा थुकिया गरिमा थहां वनेगु व थुकिं फुकसित हे कःघाना वनीगु बिचाः तयादिल । ज्याझ्वलय् प्रा.डा. भिमप्रसाद श्रेष्ठ, डा. आमोद डोम्जन व अधिवक्ता स्वागत नेपालं नं नुगःखँ तयादीगु खः ।

गणमहाविहारया प्रमुख भिक्षु सोभित महास्थविरपाखें मंगल सूत्र पाठ यानाः न्ह्याकूगु उगु ज्याझ्वलय् सभापतिया थासं न्ववासें संस्थाया नायः लिसें अभियन्ता शैलेश शाक्यभिक्षुं नेवाःतय्सं नेवाःया विकास यायेगु खःसा राजनीतिक पार्टी चायेकाः न्ह्याः वनेमाःगु आवश्यकता दु धयादिल । राजनीतिक पार्टी चायेकेगु लागिं थम्हं कुतः नं यानागु खँ न्ह्यथँसें वय्कलं मेमेगु राजनीतिक पार्टीतय्सं नेवाःतय्त प्रयोग जक यानाः वांछ्वयेगु ज्या यानाच्वंगु दु धयादिल ।

ज्याझ्वलय् सेभ नेवाः भ्यालीया सल्लाहकार संघरत्न शाक्यं लसकुस यानादीगु खःसा न्वकुस ओमशंकर श्रेष्ठं सुभाय् बियादीगु खः । अथे हे केन्द्रीय दुजः रञ्जु श्रेष्ठं चचा प्याखं हुलादीगु खःसा नायः शैलेश शाक्यं च्वयादीगु नेवाः म्येया म्युजिक भिडियो नं क्यनेज्या जूगु खः ।