यँयाः जात्राय् न्हून्हूगु चलन व प्रयोग
येँ (नेपालभाषा टाइम्स)- हनुमान ध्वाखाय् म्हिगः यःसिं थनेवं यँयाः शुरु जूगु दु । थुकिया नापं आः येँय् लाखे, पुलुकिसि, दीप्याखं, सवःद्यः, महाकाली प्याखं आदि नं पिहां वःगु दु । थ्व नापं थुगुसी यँयाः जात्राय् थीथी कथंया न्हूगु ज्याखँत नं जूगु दु ।
द्यःपिंत जीपीएस ः थुगुसी यँयाःजात्राय् लाखे, पुलुकिसि, सवःद्यः लिसें कुमारीया रथ गन थ्यनाच्वन धकाः प्रत्यक्ष जानकारी कायेगु लागिं जीपीएस प्रणाली नं छ्यलेगु ज्या जूगु दु । येँ महानगरपालिकां थुकिया व्यवस्था याःगु खः । मनपां द्यःपिंत जीपीएस प्रणालीपाखें थन थ्यनाच्वन धकाः सीकाः थःपिं नं तप्यंक अन हे वने फइकथं थ्व व्यवस्था याःगु खः ।
मिसापिंपाखें तुतः ः म्हिगः उपाकु वनेगु झ्वलय् न्हापांखुसी मिसापिंसं जक नामसंगीति ब्वनाः ब्वतिकायेगु ज्या जुल । श्रीखण्ड तरुमुल महाविहारया मय्जु पुचःपाखें रविका वज्राचार्यया नेतृत्वय् न्याम्ह मिसापिं नामसंगीति ब्वनाः उपाकु वनेगु ज्या यानादीगु खः । वय्कःपिं विहारया दुजःपिं भक्तानन्द वज्राचार्य व इश्वरानन्दव ज्राचार्य मदुगुया
उपाकु वंगु खः ।
उपाकु रुटय् गाडी बन्द ः उपाकु वनेगु लँय् न्ह्याबलें गाडी हयाः अतःमतः क्यंकीगु जूगुलिं म्हिगः उपाकु चाःहिलीगु मुक्कं लागाय् सवारी साधन बन्द यानाबिल । उपाकु चाःहिलीगु लागा दुने यातायात बन्द याःगुलिं उपाकु वनीपिंत सहज जूगु खः ।
अमेरिकाया च्याथाय् यँयाः ः थुगुसी अमेरिकाया च्यागू नगरय् यँयाः न्यायेकेगु तयारी जुइधुंकूगु दु । आः तक सीदु कथं अमेरिकाया डल्लास, न्यूयोर्क, बर्कले, शिकागो, कोलोराडो, बोस्टोन, डीसी भर्जिनिया व मेरील्याण्डय् यँयाः न्यायेकेगु घोषणा जूगु दु । थ्व बाहेक बेलायत (लण्डन) व अष्ट्रेलियाय् नं यँयाः न्यायेकेत्यंगु दु ।
येँय् थ्यन विदेशी पाहांपिं ः यँयाः स्वयेगु लागिं येँ महानगरपालिकाया ब्वनाय् थीथी विदेशी पाहांपिं म्हिगः येँय् थ्यंकः वःगु दु । यँयाःयात अन्तर्राष्ट्रियकरण यायेगु ताः तयाः वंगु छुं दँ न्ह्यवंनिसें येँ मनपां विदेशी पाहांपिंत येँय् ब्वनेगु शुरु याःगु खः ।
LEAVE YOUR COMMENTS