रियल प्रशिक्षक बर्खास्त

येँ – एल क्लासिकोय् बार्सिलोनालिसे तःधंगु अन्तरं बुइवं रियल म्याड्रिडं प्रशिक्षक जुलियन लोपेतेगीयात बर्खास्त याःगु दु । जिनेदान जिदानया थासय् वंगु जुनय् तिनि म्याड्रिड वःम्ह जुलियन लोपेतेगी साढे चार महिनां हे बर्खास्त जूगु खः । क्लबं खराब प्रर्दशन याना वयाच्वंगुलिं जुलियन लोपेतेगीयात बोर्डं बर्खास्त याःगु खः । लोपेतेगी विश्वकप शुरु जुइ छन्हु न्ह्यः स्पेनया प्रमुख प्रशिक्षक त्वःताः म्याड्रिड वःगु खः।

सन् २००१—२००२ लिपा रियल म्याड्रिडया थ्व दबलय् खराब प्रर्दशन खः । रियलं म्हितूगु लिपांगु खुगू कासाय् न्यागुलिइ पराजित जूगु खःसा छगू बराबरीइ क्वचाःगु खः । लिपांगु स्वदँय् स्वक्वलं च्यापियन्स लिग उपाधि त्याकूगु म्याड्रिड थुगुसी लिगया ९ औं थासय् लानाच्वंगु दु ।लोपेतेगीया थासय् रियलं ५२ दँया पुलांम्ह कासामि व ‘बी’ टिमया प्रशिक्षक सान्टियागो सोलारीयात अस्थायी प्रशिक्षकया जिम्मा बिउगु दु ।