प्रदूषण परीक्षण फेल जूगु सवारीयात कारवाही
येँ – आवंलि सवारी साधनया प्रदूषण परीक्षण याइगु इलय् उकी असफल जुल धाःसा अज्याःगु सवारी साधनयात नं कारवाही याइगु जूगु दु । थ्व झ्वलय् स्वनिगलय् लिपांगु इलय् याःगु सवारी प्रदूषण परीक्षणय् मापदण्ड स्वयां अप्वः प्रदूषण यानाच्वंगु सवारी साधनयात कारवाही याःगु दु ।
स्वनिगःया ट्राफिक व्यवस्थापनलिसें सवारी चालकयात अनुशानसाया कारवाही याना वयाच्वंगु महानगरीय ट्राफिक प्रहरीं सवारी प्रदूषण परीक्षणया झ्वलय् ४७६ सवारी साधन प्रदूषणय् फेल जूगु जानकारी बिउगु दु । महाशाखां स्वनिगःया ट्राफिक व्यवस्थापन व प्रदूषण नियन्त्रण यायेगु योजना अन्तर्गत शुरु याःगु अभियानय् आपालं सवारी साधनं मापदण्ड स्वयां अप्वः प्रदूषण यानाच्वंगु लुया वःगु धाःगु दु ।
अज्याःगु सवारी साधनयात कारवाही यानाः मापदण्डकथंया दयेकेत नं निर्देशन बियागु महाशाखाया प्रवक्ता जयराज सापकोटां जानकारी बियादिल ।महाशाखां वंगु चैत २१ गतेनिसें बैशाख ३ गतेतक सवारी प्रदूषण जांच याःगु खः । थ्व बाःछिया अवधि दुने याःगु सवारी परीक्षणय् प्रदूषणय् असफल जूगु सवारीयात कारवाही याःगु खः ।
थ्व अवधिइ महाशाखां थीथी थासय् सवारी प्रदूषण जांच नापं सवारी चालकयात सचेतना शिक्षा तकं बिउगु खः ।अथे हे गौशाला, शंखपार्क, सुकेधारा, धुम्बाराही, चप्पल कारखाना लगायत च्यागू स्वयां अप्वःथासय् जेब्रा क्रसिङ निर्माण यायेगु नापं नीन्यासः स्वयां अप्वः मोटरसाइकल व स्कुटर चालकयात सचेतना शिक्षा बिउगु खः ।
LEAVE YOUR COMMENTS