धर्मकीर्ति विहारयात महानगरया ग्वाहालि

येँ – येँ महानगरपालिकाया प्रमुख विद्यासुून्दर शाक्यं संघ, प्रदेश व स्थानीय यानाः स्वंगू तहया सरकारमध्ये स्थानीयवासीनाप प्रत्यक्ष संलग्न जुयाः ज्या याइगु निकाय धइगु स्थानीय सरकार हे खः धयादिल । स्थानीय निकाय प्रत्यक्ष रुपं हे स्थानीयवासीया सरोकार दुगु विषयय् ज्या याइगु जूगुलिं थःपिंसं नं उकथं हे थःगु जिम्मेवारी व दायित्व पूवंका वयाच्वनागु नं वय्कलं धयादिल ।

‘संघ व प्रदेश च्वय्या तहया सरकार खःसा स्थानीय धइगु जनतानाप प्रत्यक्ष सरोकार तइगु निकाय खः’ येँ महानगर प्रमुख शाक्यं धयादिल, ‘स्थानीय भाषा, कला, साहित्य, धर्म, संस्कृति, सम्पदा, सम्पदा, भौतिक संरचना आदि दक्वं थासय् ज्या याइगु स्थानीय निकायं हे खः । थ्व हे जिम्मेवारीयात जक थःपिंसं पूवंकागु खः ।’

येँ महानगर प्रमुख शाक्यं थनया सीघलय् च्वंगु धर्मकीर्ति विहार भवन थप निर्माण यायेत चेक लःल्हायेगु ज्याझ्वलय् नवासें उगु खँ धयादीगु खः । वय्कलं महानगरया भाषा, कला, संस्कृति, धर्म, जात्रा, पर्व, रीतिथिति, सम्पदा, विहार निर्माणया आदि ज्या यायेगु त्वःफिकेगु जुइमखु धासें अझं योमाःगु वा दयेकेमाःगु अज्याःगु संरचना गनं छुं दुसा थःपिंत धायेत नं इनाप यानादिल ।

वय्कलं अज्याःगु संरचना निर्माणया निंतिं दकलय् न्हापां वडाय् स्वापू तयेत धासें वडापाखें हे महानगरय् वइगु खःसां तप्यंक हे महानगरय् वया स्वापू तःसां जिउ धासें अज्याःगु संरचना याये खन धाःसा थःत नं लय्ताः वइ धयालि ।

उपप्रमुख हरिप्रभा खड्गी श्रेष्ठं समाजया भिं जुृइगु ज्या यायेत गबलें नं लिचिलेगु जुइ मखु धासें थःपिं निर्वाचित जुया वयेधुंकाः आपालं समाजया भिंगु ज्याय् न्ह्यचिला च्वनागु दु धयादिल । वय्कलं न्हापा स्थानीय सरकार मदुगु इलय् अस्तव्यस्त जुयाच्वंगु येँ देय्यात संरक्षण यायेगु ल्याखं आपालं ज्या जूगु खँ कनादिल ।

वय्कलं धयादिल, ‘न्हापा स्थानीय सरकार मदुगु इलय् छुं नं ज्या यायेत थाकुयाच्वंगु अवस्था खःसा थःपिं वयेधुंकाः आपालं धार्मिक, ऐतिहासिक सम्पदालिसें थनया संरचना निर्माण यायेगु व उकिया संरक्षण यायेगु ज्या जूगु दु धयादिल ।

धर्मकीर्ति विहारया प्रमुख अग्गमहाग्रन्थवाचक शासनधज धम्माचरिय अनागारिका धम्मवति गुरुमां नं मनू जुयाः जन्म जुसेंलिं सकसिगुं भिं जुइगु ज्या यायेमाः धयाबिज्यात । मेपिनिगु भिं जुइगु ज्या यात धाःसा हे जक समाजं वयागु नां मदयेधुंकाः नं कायेगु व लुमंका तयेगु यानाच्वनी धयाबिज्यासें वसपोलं मनूतय्सं भिंगु व मभिंगु निगुलिं ज्या यानाः नां कमे यानाच्वंगु दइ, अथे खःसां भिंगु ज्या यात धाःसा समाजं अनित्य मनुष्य जीवन लिपा नं वयागु नां कयाच्वनी धयाबिज्यात ।

विहार निर्माण प्रसंगय् थःपिनिगु ज्या भिक्षा फ्वनेगु जक जूगुलिं ऐन कानूनया खँ थःपिंसं छुं मसिउ धयाबिज्यासें विहार निर्माणय् आर्थिक, प्राविधिकलिसें थीथीकथं ग्वाालि यानादींत ओवाद उपदेश नं बियाबिज्याःगु खः ।

उगु इलय् विहार निर्माणया निंतिं जूगु सम्झौताकथं न्हापांगु किस्ता वापत छगू करोड स्वीगू लख ग्वीन्याद्वः तका दांया चेक महानगर प्रसख शाक्यं विहार प्रमुख धम्मवती गुरुमायात लःल्हानादीगु खः ।

पंचशील प्रार्थनापाखें न्ह्याःगु ज्याझ्वलय् धर्मकीर्ति संरक्षण कोषया दुजः अनागारिका खेमावती गुरुमां नं लसकुस याना बिज्याःगु ज्याझ्वलय् धर्मकीर्ति परियत्ति केन्द्रपाखें परियत्ति उत्तीर्ण जृुयादीपिं परिक्षार्थीतय्त मूपाहां प्रमुख शाक्य व उपप्रमुख खड्गी श्रेष्ठं सिरपाः व बुद्ध मूर्ति लःल्हानादीगु खः ।

केन्द्रपाखें संचालन जुयाच्वंगु परियत्ति शिक्षा बारे अनागारिका केशावति गुरुमां नं जानकारी बियादीगु ज्याझ्वलय् बोर्डय वयेत ताःलाःपिं दयालक्ष्मी शाक्य, शान्ति शाक्य, महानगर प्रमुख शाक्य, उपप्रमुख खड्गी श्रेष्ठं नं नुगःखँ तयादीगु खःसा धर्मकीर्ति संरक्षण कोषया सचिव प्रफुल्लकमल ताम्राकारं सुभाय् देछानादीगु खः ।

सम्बन्धित बुखँ

LEAVE YOUR COMMENTS