एनसिसीयात हकप्रद पितबीत स्वीकृति

येँ – नेपाल क्रेडिट एण्ड कमर्स बैंक (एनसिसी)यात हकप्रद निष्काशन यायेत स्वीकृति बिउगु दु । नेपाल धितोपत्र बोर्डं शुक्रवाः बैंकयात हकप्रद पितबीत अनुमति बिउगु खः । बैंकं आः ५० प्रतिशत हकप्रद शेयर निष्काशन याइगु जूगु दु । बैंकं निगू अर्ब ३३ करोड ९५ लाख २९ हजार तका बराबरया निगू करोड ३३ लाख ९५ हजार २९१ कित्ता शेयर पितबीत्यंगु खः ।

हकप्रद पिहां वःसां एनसिसी बैंकं राष्ट्र बैंकं तोके यानातःकथं च्यागू अर्ब चुक्ता पुँजी धाःसा थ्यंके मफइगु जुयाच्वंग्ु दु । थौंकन्हय् बैंकया चुक्ता पुँजी ४ अर्ब ६७ करोड ९० लाख दु । हकप्रद पिहां वयेवं बैंकया चुक्ता पुँजी ७ अर्ब १ करोड ८५ लाख थ्यनी । आः मगाःगु पुँजी चूलाकेगु निंतिं बैंकं बोनसयात प्राथमिकता बियाः मेगु विकल्प मालेमालेगु जुइ ।

हकप्रद पितबीगु निंतिं बैंकं सनराइज क्यापिटलयात विक्री प्रबन्धक नियुक्त यानातयेधुंकूगु दु । एनसिसी बैंकं वंगु निदँ न्ह्यवनिसें वार्षिक साधारण सभा तकं मयासे च्वंगु खः । निदँ तक साधारण सभा मयाःगुलिं लगानीकर्तातय्सं हे कम्पनी रजिस्ट्रारय् उजुरी तयेधुंकाः रजिस्ट्रार कार्यालयं विशेष साधारण सभा यायेत निर्देशन बिउगु खः ।