नेपाल संवत्या मान्यताय् क्यनेमाःगु चिउताः

नेपाःया राष्ट्रिय संवत् नेपाल संवत्या न्हूदँ हनेगु नेपाःया राष्ट्रिय नखः खः । थ्व न्हूदँया लसता अनेक ज्याझ्वःत यानाः हनेगु याइ । छगू इलय् न्हूदँ हनेगु ज्या कन्या मन्दीरया कःसिइ जक सीमित जुयाच्वंगु थासय् आः थ्व नेपाःन्यंक जक मखु, देश विदेशय् च्वंपिंसं तकं हनेगु याना हयेधुंकूगु दु । न्हापा नेवाःतय्सं जक हनीगु धकाः कुंखिनाच्वंगु थुगु न्हूदँ आः फुक्क हे जातजातिया मनूतय्सं हना वयाच्वंगु दु । उलि जक मखु आःया इलय् देय्या सरकार प्रमुखं तकं थ्व न्हूदँ हनेगु ज्याझ्वलय् ब्वति कयाः थुकिया गरिमा अप्वयेकेगु याना हयेधुंकूगु दु । थीथी खलः पुचःतय्सं नं सरकार प्रमुख वा मन्त्रीतय्त ब्वनाः न्हूदँया लसताया् तुच्चा ज्याझ्वः व सम्मान सिरपाः लःल्हाकेगु ज्याझ्वःया निरन्तरता बियाच्वंगु दु ।

नेपाल संवत् राष्ट्रिय संवत् खः, थुकिया सरकारं मान्यता बी हे माः धयागु नारा ज्वनाः नेपालभाषा मंकाः खलकं न्ह्याकूगु भिंतुना सांस्कृतिक जुलुसं सकल नेपाःमितय्गु दथुइ नेपाल संवत्या महत्ता थुइका बीत तःधंगु भूमिका म्हितूगु दु । पंचायती शासनकालय् प्रतिबन्धित राजनीतिक पार्टीया नेता कार्यकर्तातय्सं थुज्वःगु हे भिंतुना सांस्कृतिक जुलुसय् सहभागी जुयाः थःपिनिगु मान्यता नं नेपाल संवत् राष्ट्रया हे संवत् खः धायेगु जक याना वयाच्वंगु मखसे सरकारयात थःपिनिगु राजनीतिक पार्टी प्रतिया समर्थन आम जनताया दु धयागु क्यनेकथं नं जुयाच्वंगु खः ।

नेपाल संवत् न्हूदँया लसताय् भिंतुना सन्देश बीगु ज्याय् धेंधेंबल्लाः जुइगु तकं जुयाच्वंगु खः । आः वयाः राजनीतिया परिदृश्य हिलेधुंकूगु दु । उकथं न्हूदँया सांस्कृतिक जुलुसय् थःपिं नं जनताया माग नापं दु धकाः क्यना जूपिं मनूत राज्यसत्ताय् थ्यंगु जक मखुसें तःक्वः सम्बन्धित विधाया मन्त्री नं जुइधुंकूगु दु । तर राष्ट्रिय संवत् नेपाल संवत्या छ्यलाबुला आःतक नं राज्यपाखें जुइफुगु मदुनि । नेपाः सरकारं नेपाल संवत्यात राष्ट्रिय संवत्या मान्यता बियातःगु दु, तर थ्व गबले, गनं सुनां छ्यलीगु धयागु खँ आः तक्क प्रस्ट मदु । नेपाःया संविधानय् नेपाल संवत्या न्ह्यथना जुइमा धकाः संविधान सभाय् संविधान च्वयाच्वंगु इलय् प्रस्ताव दर्ता तकं जुलं नं थुकियात राज्य सत्ताय् थ्यंपिं, छगू इलय् नेपाल संवत्या हिमायती धकाः न्ह्यब्वयेत लालयीत जूपिं मनूतय्सं हे बेइमानी याःगु खनेदत । थुकथं नेपाल संवत्या विषययात कयाः नं थुकिया अधिकारकर्मीतय्त अपहेलना यायेगु ज्या जुल ।

आः थुपिंपाखें नेपाल संवत्या अधिकारकर्मीतय्गु विश्वास मंत धकाः भद्र असन्तुष्टी न्ह्यब्वयेगुया छगू लँपु दँय्दसं थुमित मूपाहां धकाः सम्मान याना वयाच्वनागुया ‘क्रम भङ्ग’ आवश्यक दु । अथे धकाः नेपाल संवत्या न्हूदँ हनेगु जोश जाँगरय् गनं कमी हयेमाःगु आवश्यकता मदु ।

नेवाःत थनया आदिवासी खः । थनया आपालं जात्रा, नखः, कला, संस्कृति नेवाः पुर्खातय्सं हे नीस्वना वंगु खँय् गनं विवाद मदु । तर नेवाःतय्त राज्यं न्ह्याब्लें निगूगु दर्जाया नागरिक सरह ब्यवहार यानाच्वंगुया नं अनेक दृष्टान्त दु । थुज्वःगु दुव्र्यवहार जुयाच्वन नं नेवाःतय्सं थःपिनिगु धैर्य बल्लाकाच्वंगु दु । तर उकियात आः बुलुहुँ पित हयेमाःगु नं आवश्यकता दु ।

नेवाःतय्गु तःजिगु नखः यँयाः लगायत मेमेगु नं खः । अज्याःगु नखः हनेत न्हापाया पुर्खातय्सं माक्व आयस्ता तयाः गुथि, जात्रा, न्यानाच्वनेमाः धयागु मान्यता कयातःगु खः । लिपा वनाः पंचायती शासनय् अज्याःगु गुथित गुथि संस्थानं सरकारीकरण यात, माःकथं जक सीमित खर्च पुजाआजाया निंतिं बीगु ब्यवस्था यात । अज्याःगु जग्गा सरकारीकरण लिपा आःया इलय् अन भब्य भवनत दयेकाः सरकारपाखें गाक्कं आम्दानी यानाच्वंगु दु । तर मूलकारक जात्रा नखः हनेत माक्व खर्च बीगु यानाच्वंगु मदु ।

थुज्वःगु असन्तुष्टि क्यनेगु ज्या दकले न्हापां यँयाःया इलय् सरकारी खर्चय् मितब्ययिता हयेगु धकाः तत्कालिन अर्थमन्त्री डा.बाबुराम भट्टराईनं खर्च क्वपालेवं उगु जात्राय् तःधंगु बबाल जुल । जात्राया मू आकर्षक सवःभक्कु, लाखे व पुलुकिसि उगु जात्राया मूपाहां जुयाच्वंम्ह राष्ट्रपतिया न्ह्यःने हे मवसें थुमिसं थःपिनिगु असन्तुष्टि क्यन ।

उकथं हे थुगुसी यँयाःया इलय् परम्परागतरुपं क्यनीगु ‘दशअवतार’ क्यनेत खर्चया ब्यवस्था मजूगु खँय् ‘दशअवतार’ जात्राया मू ब्यक्ति राष्ट्रपतिया न्ह्यःने क्यनेगु ज्या मजुल । थःपिनिगु असन्तुष्टि शिष्टरुपं न्ह्यब्वयेगु ज्या जुल । तर मेमेगु इलय् दशअवतार क्यनेगु ज्या निरन्तर हे जुल ।

थ्व भद्र विरोधया ज्या आःया इलय् नेपाल संवत्या न्हूदँ हनेगु ज्याझ्वलय् नं क्यनेमाःगु आवश्यकता दु । सरकार प्रमुख वा मन्त्रीत मूपाहां यानाः नेपाल संवत्या विशेष ज्याझ्वःत हनेगु याना वयाच्वंगु सन्दर्भय् थुपिं मूपाहांतय्सं नेपाल संवत्यात कयाः थःपिंसं याये धकाः बिउगु बचं तकं पूवंका मच्वंगु दँदँ दयेधुंकल । आः थुपिंपाखें नेपाल संवत्या अधिकारकर्मीतय्गु विश्वास मंत धकाः भद्र असन्तुष्टी न्ह्यब्वयेगुया छगू लँपु दँय्दसं थुमित मूपाहां धकाः सम्मान याना वयाच्वनागुया ‘क्रम भङ्ग’ आवश्यक दु । अथे धकाः नेपाल संवत्या न्हूदँ हनेगु जोश जाँगरय् गनं कमी हयेमाःगु आवश्यकता मदु । मात्र थुज्वःपिं, झीगु आस्था व विश्वासयात झंगः लानाः मूपाहां जूवइपिंत थःपिनिगु वितृष्णा न्ह्यब्वयेगु जक खः ।

नेपाल संवत्यात राष्ट्रं राष्ट्रिय संवत्या मान्यता बीधुंकाः थुकिया गरिमा तयेगु ज्याय् थुपिं गम्भीर जुइमाः । गथे नेपाल संवत्या प्रवर्तक शंखधर साख्वाःयात राष्ट्रिय विभूति घोषणा जूगु इलय् सम्मान याना, नेपाल संवत्यात राष्ट्रिय संवत्यात धकाः घोषणा जूगु इलय् सम्मान याना, तर थुपिं आःया सरकारया प्रधानमन्त्री लगायतया मन्त्रीत नेपाल संवत्यात संविधानत मान्यता दयेमाः धकाः संविधान सभाय् मतदान जूगु इलय् विपक्षय् मतदान यानाः नेपाल संवत्यात थ्वानाहःपिं मनूतय्त नेपाल संवत्या न्हूदँ ज्याझ्वलय् मूपाहां दयेकाः न्हूदँ हनेगुया तुक मदु । नेपाल संवत्या अधिकारकर्मीतय्सं म्होतिं नं थःपिनिगु असन्तुष्टि न्ह्यब्वयेगु आँट यायेमाः ।

सम्बन्धित बुखँ

LEAVE YOUR COMMENTS