ने. सं. ११४४ ञलागा पारू -

प्रदेशसभाया बैठक अन्तिम चरणय्

नेपाःया संविधानकथं देशय् न्हापांखुसी जूगु प्रदेशसभा सदस्य निर्वाचनलिपा न्हय्गुलिं प्रदेशय् प्रदेशसभाया न्हापांगु बैठक च्वनेत्यंगु दु । संघीयता कार्यान्वयनया निंति प्रदेशसभाया गठन कोशल्वहं खः । निर्वाचनलिपा सरकारं म्हो अवधिया दुने क्वःछिउगु कार्यस्थलय् प्रदेशसभाया बैठकया तयारी नं हथासं जुयाच्वंगु दु । सरकारं संविधानकथं थ्व हे माघ ३ गते न्हय्गुलिं प्रदेशय् प्रदेश प्रमुख व अस्थायी कार्यस्थल क्वःछिउगु खः । निर्वाचन आयोगं नं प्रदेशसभाया अन्तिम मतपरिणाम थ्व हे माघ ३ गते हे सार्वजनिक याःगु खः ।

संविधानया धारा १८३ कथं प्रदेश प्रमुखं प्रदेशसभाया निंतिं जूगु निर्वाचनया अन्तिम परिणाम घोषणा जूगु मितिं २० न्हुया दुने प्रदेशसभाया अधिवेशन आह्वान यायेमाः । व हे प्रावधानकथं न्हय्गुलिं प्रदेशसभाया न्हापांगु बैठक च्वनेत्यंगु दु । प्रदेशसभाय् सम्बन्धित प्रदेशपाखें प्रतिनिधिसभाय् न्हाप जुइम्ह निर्वाचित जुइगु प्रणालीकथं निर्वाचित जुइगु सदस्य संख्याया निदुगं संख्याय् जू वइगु सदस्य व उगु संख्यायात ६० प्रतिशत माने यानाः ल्यं दुगु ४० प्रतिशत समानुपातिक निर्वाचन प्रणालीपाखें निर्वाचित जुइपिं सदस्य जुइ ।

संविधानया धारा १८२ लय् प्रदेशभासभाया न्हापांगु बैठक शुरु जूगु मितिं १५ न्हुया दुने प्रदेशसभाया सदस्यतय्सं थःपिंपाखें प्रदेश सभामुख व उपसभामुखया निर्वाचन यायेमाःगु व्यवस्था दु । संविधानकथं न्ह्यव हे विघटन जूसा बाहेक प्रदेशसभाया कार्यकाल न्यादँया जुइ । संविधानकथं प्रदेश प्रमुखं प्रदेश सभाय् बहुमत प्राप्त संसदीय दलया नेतायात मुख्यमन्त्री नियुक्त याइ अले वयागु अध्यक्षताय् प्रदेश मन्त्रिपरिषद् गठन जुइ । देशसभाय् गुगुं नं दलया स्पष्ट बहुमत मदुगु अवस्थाय् प्रदेशसभाय् प्रतिनिधित्व याइगु निगू व निगू स्वयां अप्वः दलया समर्थतय् बहुमत प्राप्त याये फइगु प्रदेशसभाया सदस्ययात प्रदेश प्रमुखं मुख्यमन्त्री नियुक्त याइ ।

प्रदेशसभा निर्वाचनया अन्तिम परिणाम घोषणा जूगु मितिं ३० न्हुया दुने मुख्यमन्त्री नियुक्त जुइ फइगु अवस्था मदुसा वा उकथं नियुक्त मुख्यमन्त्रीं विश्वासया मत प्राप्त याये मफुत धाःसा प्रदेश प्रमुखं प्रदेश सभाया दकलय् अप्वः सदस्य दुगु संसदीय दलया नेतायात मुख्यमन्त्री नियुक्त यायेगु व्यवस्था दु । थुकथं नियुक्त मुख्यमन्त्रींं उकथं नियुक्त जूगु स्वीन्हुया दुने प्रदेशसभां विश्वासया मत प्राप्त यायेमाः । संविधानकथं प्रदेश प्रमुखं मुख्यमन्त्रीया सिफारिसय् प्रदेशसभाया सदस्यमध्येपाखें समावेशी सिद्धान्त बमोजिम मुख्यमन्त्रीलिसें प्रदेशसभया कुल सदस्य संख्याया २० प्रतिशतं अप्वः मजुइकथं प्रदेश मन्त्रिपरिषद् गठन याइ ।

न्हय्गुलिं प्रदेशसभा सदस्य माघ ७ गते हे पद व गोपनीयताया सपथ काये धुंकूगु दुसा थ्व हे वाःया दुने प्रदेशसभाया न्हापांगु बैठक च्वनेगु तयारी नं तीव्ररुपं जुयाच्वंगु दु । प्रदेशसभा संचालन व आवश्यक तयारीया निंतिं केन्द्र सरकारं सचिव, सहसचिव लगायत संघीय सचिवालयया कर्मचारी सम्बन्धित प्रदेशय् छ्वये धुंकूगु दु ।

# प्रदेश १या बैठक २२ गते
प्रदेश नं. १ या प्रदेश प्रमुख डा. गोविन्दबहादुर तुम्बाहाङं प्रदेशसभाया न्हापांगु बैठक माघ २२ गतेया निंतिं आह्वान यानादीगु दु । विराटनगरस्थित जिल्ला समन्वय ज्याकूया सभा भवनय् प्रदेशसभाया न्हापांगु बैठक च्वनीगु क्वःछी धुंकूगु दु । प्रदेशसभाय् प्रत्यक्षपाखें निर्वाचित ५६ व समानुपातिक ३७ यानाः ९३ सदस्य दु । सभाभवनया मंचय् सभामुख, संसद सचिव, कार्य व्यवस्थाया मेच तयेगु निर्देशनकथं व्यवस्था मिले यानातःगु दु ।

# प्रदेश नं २ लय् तयारी तीव्र
प्रदेश नं. २ या प्रदेश प्रमुख रत्नेश्वरलाल कायस्थं प्रदेशसभाया न्हापांगु बैठक माघ २१ गतेया निंतिं आह्वान यानादीगु दु । जनकपुरय् च्वंगु जिल्ला शिक्षा ज्याकुथिइ च्वंगु शैक्षिक तालिम केन्द्रय् च्वनीगु जूगुलिं तयारी तीव्ररुपं जुयाच्वंगु दु । थुगु प्रदेशय् प्रत्यक्षय् निर्वाचित ६४ व समानुपातिक ४३ यानाः १०७ सदस्य दु ।

# प्रदेश नं ३ य् न्हापांगु बैठक
प्रदेश प्रमुख अनुराधा कोइरालां प्रदेश नं. ३ या प्रदेशसभाया बैठक दकलय् न्हापां थौं माघ १८ गतेया निंतिं आह्वान यानादीगु दु । छम्ह जक मिसा प्रदेश प्रमुख दुगु थुगु प्रदेशया अस्थायी केन्द्र मकवानपुरया हैटौंडा क्वःछिनातःगु दु । थौं न्हापांगु बैठकं प्रदेशसभा संचालनसम्बन्धी अन्तरिम नियमावली पारित यायेगु व सभामुख व उपसभामुखया निर्वाचनया मिति क्वःछी । थुगु प्रदेशय् प्रत्यक्ष निर्वाचित ६६ समानुपातिक ४४ यानाः ११० (दकलय् अप्वः) प्रदेशसभा सदस्य दु । बैठकया प्रत्यक्ष प्रशारणया नं व्यवस्था यानातःगु दु ।

# प्रदेश नं ४ या माघ २२ य्
प्रदेश प्रमुख बाबुराम कुँवरं प्रदेश नं. ४ या प्रदेशसभाया बैठक थ्व हे माघ २२ गते आह्वान यानादीगु दु । पोखराया नदीपुरय् च्वंगु नगर विकास प्रशिक्षण केन्द्रया भवन व सभाकक्षयात व्यवस्थित यायेगु ज्या जुयाच्वंगु दु । प्राकृतिक सुन्दरतां जाःगु थुगु प्रदेशय् प्रत्यक्ष निर्वाचित ३६ व समानुपातिक २४ यानाः ६० सदस्य दु ।

# प्रदेश नं. ५ या अन्तिम चरणय्
प्रदेश नं. ५ या प्रमुख उमाकान्त झानं संवैधानिक व्यवस्थाकथं प्रदेशसभाया बैठक माघ २१ गतेया निंतिं आह्वान यानादीगु दु । सरकारं थुगु प्रदेशया अस्थायी कार्यसंचालन केन्दं रुपन्देहीया बुटवल क्वःछिउगु दु । बुटवल उद्योग वाणिज्य संघया हलय् जुइगु न्हापांगु बैठकया तयारी अन्तिम चरणय् थ्यने धुंकूगु दु । थुगु प्रदेशय् प्रत्यक्ष निर्वाचित ५२ व समानुपातिक ३५ यानाः ८७ सदस्य दु ।

# प्रदेश नं. ६ या बैठक सुर्खेतय्
प्रदेश प्रमुख दुर्गाकेशर खनालं प्रदेश नं. ६ या प्रदेशभाया न्हापांगु बैठक माघ २१ गतेया निंतिं आह्वान यानादीगु दु । सुर्खेतया क्षेत्रीय वन ज्याकूया हलय् च्वनीगु बैठकया तयारी नं अन्तिम चरणय् थ्यने धुंकूगु दु । थुगु प्रदेशय् प्रत्यक्ष निर्वाचित २४ व समानुपातिक १६ यानाः ४० (दकलय् म्हो) सदस्य दु ।

#प्रदेश नं. ७ य् तयारी तीव्र
प्रदेश प्रमुख मोहनराज मल्लं प्रदेश नं. ७या न्हापांगु बैठक माघ २१ गते धनगढीया जिल्ला समन्वय समितिया हलय् आह्वान यानादीगु दु । बैठकया निंतिं रंग पायेगु निसें मेच टेबुल व्यवस्थापन यायेगु ज्या जुयाच्वंगु दु । थुगु प्रदेशय् प्रत्यक्ष निर्वाचित ३२ व समानुपातिक २१ यानाः मुक्कं ५३ सदस्य दु ।