द्वाल्खा भिंद्यःया देगः चायेकल

येँ – द्वाल्खा भिंद्यःया देगः सर्वसाधारणया दर्शनया निंतिं चायेकूगु दु । कोरोनाया निगूगु लहरया संक्रमण तच्वया वनेवं सर्वसाधारणयात दर्शनया निंतिं बन्द यानातःगु देगः वंगु सोमवाःनिसें चायेकूगु खः ।

दोलखा जिल्ला भिमेश्वर नगरपालिका वडा नं. २ लय् च्वंगु उगु देगः कोरोनाया निगूगु लहरया संक्रमण तच्वया वनेवं वंगु न्याला न्ह्यवंनिसें नित्य पुजा यायेगु बाहेकं सर्वसाधारण दर्शनार्थीया निंतिं बन्द यानातःगु खः ।

कोरोना संक्रमितया ल्याखय् वयाच्वंगु म्होतिलिसें जनजीवन नं सामान्य अवस्थाय् वयेवं दर्शनार्थीया निंतिं देगः खुल्ला याःगु खः । द्यः दर्शनया निंतिं देगः खुल्ला याःसां अन वइपिं भक्तजनतय्सं स्वास्थ्य सम्बन्धी मापदण्ड धाःसा पूर्ण रुपं पालना यायेमाःगु व्यवस्था यानागु वडाअध्यक्ष विराजमान श्रेष्ठं कनािदल ।

भिमेश्वर मन्दिर व्यवस्थापन समितिया सल्लाहकार तकं जुयादीम्ह श्रेष्ठं सामान्य पुजा यायेगु बाहेक बलि पुजा यायेगुलिइ रोके याना तयागु जानकारी बियादिल ।