मतय् २० प्रतिशत छुट बीगु प्राधिकरणया निर्णय

येँ – नेपाल विद्युत प्राधिकरणं काेराेना भाइरसया कारणं उत्पन्न परिस्थितियात ध्यानय् तयाः नेपाल सरकारं जारी याःगु आदेश व निर्देशनया आधारय् विद्युतीय महसुलय् २० प्रतिशत छुट बीगु निर्णय याःगु दु ।

प्रधिकरणया कार्यकारी निर्देशक कुलमान घिसिङं बुधवाः थःमार्फतया वितरण व ग्राहक सेवा निर्देशनालययात सर्कुलर जारी यानाः उगु निर्देशन बियादीगु खः । सर्कुलरय् चैत १४ गते च्वंगु प्राधिकरणया सञ्चालक समितिया निर्णय कथं १५० यूनिट तक विद्युत खपत याइपिं ग्राहकया न्यूनतम सेवा शुल्क यथावत दइगु कथं खपत वापतया शुल्कय् २० प्रतिशत छुट बीत धयातःगु दु ।

निर्णय कथं १५० यूनिट स्वयां च्वये न्ह्याक्व नं विद्युत खपत याइगु सिंगल फेज वा थ्री फेजया ग्राहकया न्यूनतम सेवा शुल्क यथावत दइगु कथं विद्युत खपतया शुल्कय् अधिकतम १५० यूनिटया २० प्रतिशत विद्युत महशुलय् छुट बीगु न्ह्यथनातःगु दु । अज्याःगु छुट २०७६ साल चैत महिनाया मिटर रिडिङया बिलय् बीगु खँ प्राधिकरणं धाःगु दु ।