२ नं. प्रदेशया थःगु हे प्रहरी
केन्द्र सरकारं अनुमति मबिउगु कारणं टक्कर जुइगु सम्भावना
येँ – सुरुंनिसें हे संघीय सरकारलिसे तनावपूर्ण स्वापू तया वयाच्वंगु २ नम्बर प्रदेश सरकारं आः थःपिनि प्रदेशया निंतिं थःपिंसं हे प्रहरी नियुक्त याये दइगु कानून पारित यायेवं संघलिसेया स्वापू अझ हे स्यना वनीगु संकेत खने दया वःगु दु । प्रदेश सरकारं अनया संसदय् थ्व कानून हःबलय् केन्द्रीय सरकारया नेतृत्व यानाच्वंगु नेकपां उकिया विरोध याःगु खःसा विपक्षी नेपाली कांग्रेस लगायत संघीय समाजवादी फोरमं धाःसा उकियात समर्थन याःगु खः ।
बहुमतं उगु विधेयक पारित जूगु कारणं आः प्रदेशया थःगु हे प्रहरी सेवा सुरु जुइगु निश्चित जूगु दु । केन्द्र सरकारं धाःसा प्रदेशया बिस्कं प्रहरी तयेगु अनुमति मबिउसां प्रदेश सरकारं धाःसा संविधानय् हे प्रदेशया सुरक्षा थःपिंसं हे यायेमाः धकाः च्वयातःगु कारणं बिस्कं प्रहरी आवश्यक जूगु खँ धाःगु दु ।
यदि प्रदेश सरकारं थःगु हे प्रहरी दयेकल धाःसा प्रदेशय् नेपाल प्रहरीं खटे याना तःपिं प्रहरीया ज्या व हैसियत छु जुइ धइगु न्ह्यसः पिहां वःगु दु । थुकिं यानाः निगू प्रहरीया दथुइ समेत असमझदारी ब्वलनाः सुरक्षा व्यवस्था अझ गंजागोल फुगु खँ धयाहःगु दु ।मेखे सुरक्षा सम्बन्धी मेगु छगू सूत्रं धाःसा आः स्थानीय सरकारतय्सं ला नगर प्रहरी धकाः थःगु हे प्रहरी सेवा दयेकेधुंकाः प्रदेश सरकारयात थःगु प्रदेश प्रहरी दयेकेत छुं हे समस्या मजुइगु दावी याःगु दु ।
२ नम्बर प्रदेशं थःगु हे प्रहरी तयेगु कानून पारित याःसां थ्व प्रहरीया संख्या व संरचना गथे जुइ धइगु बारे धाःसा आः तक छुं निर्णय मयाःनि । सरकारं आः सुरक्षा सल्लाहकार समेत नियुक्त यायेधुंकूगुलिं थुकिया संरचना नं तयार याना यंकूगु खँ सूत्रं धाःगु दु ।
सुरक्षा सल्लाहकारय् कायस्थ
थ्वहे झ्वलय् २ नम्बर प्रदेशया सरकारं पुलांम्ह एआईजी विजयलाल कायस्थयात सरकारया सुरक्षा सल्लाहकार नियुक्त याःगु दु । वय्कःयात वंगु वालय् च्वंगु प्रदेश सरकारया मन्त्रिमण्डल बैठकं सुरक्षा सल्लाहकार नियुक्त यायेगु निर्णय याःगु खः । थ्व स्वयां न्ह्यः भाजु कायस्थं २ नम्बर प्रदेशया हे प्रहरी प्रमुख जुयाच्वंगु इलय् ३० वर्षे सेवाया प्रावधान कथं अवकास कयादीगु खः ।
सरकारया सुरक्षा सल्लाहकार पदयात थम्हं चुनौतीपूर्ण ज्याया रुपय् कयागु खँ भाजु कायस्थं ‘नेपालभाषा टाइम्स’ यात कनादिल । २ नम्बर प्रदेश थौंकन्हय् अतिकं संवेदनशील थाय् जूगु कारणं उगु प्रदेशया सुरक्षा मेथाय् स्वयां जटिल जुइगु खँ नं वय्कलं कनादिल ।
LEAVE YOUR COMMENTS