मस्जिदया नामं व्यक्तिया सम्पत्ति कब्जा यायेगु कुतः

येँ- येँया धरहरा नापसं च्वंगु ६ आना स्वयां अप्वः क्षेत्रफल दुगु निजी जग्गायात मुस्मांतय् नमाज ब्वनीगु मस्जिद धइगु नामय् हड्पे यायेत स्वःगु खँ सीदुगु दु । वंगु शनिवाः स्थानीय जग्गा धनीतय्सं थःपिनि जग्गाय् दनातःगु टहरा थुनेगु लागिं डोजर चले यायेवं अन च्वनाच्वंपिं मुस्मांतय्सं ‘मस्जिदय् डोजर चले यात’ धइगु द्वपं बियाः थुनेधुंकूगु टहरा हानं दनेगु ज्या याःगु खः ।

निजी जग्गायात मस्जिदया नां बियाः थःगु याना कायेगु मुस्लिम समुदायया थ्व कुतःया कारणं देशय् विद्यमान धार्मिक सद्भाव समेत खलल जुइ फइगु खतरा वःगु खँ धाःगु दु ।

न्हापा कित्ता नम्बर ५२ जुयाच्वंगु ६ आना १ पैसा २ दाम दुगु उगु जग्गा स्थानीय नरेन्द्र विक्रम राणां थःगु नामय् यानातःगु खः । राणां अन च्वनाच्वंपिं मुस्मांतय्त चीकेगु लागिं कुतः याःबलय् उकिया विरुद्ध येँ महानगरपालिकाय् उजुरी लात । तर येँ महानगरपालिकां वि.सं. २०४३ वैशाख २४ गते थ्व जग्गा राणायागु हे खः धइगु निर्णय यासें मुस्मांतय्त थाय् त्वःतेत आदेश बिल । मनपां याःगु थ्व निर्णयया विरुद्ध मुस्लिम समुदायया प्रतिनिधित्व यासें परवेज अख्तर अन्सारी नांयाम्ह मनुखं पुनरावेदन अदालत यलय् मुद्दा तयाबिल । तर वि.सं. २०५२ कार्तिक २२ गते पुनरावेदन अदालतं नं थ्व जग्गा राणायागु हे खः धइगु येँ मनपाया निर्णय वैध जुइगु फैसला यात । अनंलि परवेज अख्तरं सर्वोच्च अदालतय् रिट दायर यात । सर्वोच्चपाखें नं २०६९ असार १४ गते कुन्हु पुनरावेदन अदालतया फैसलायात हे सदर ठहर यात । उगु इलय् सर्वोच्च अदालतया स्वम्ह न्यायाधीशपिं रामकुमार प्रसाद साह, ताहिर अली अन्सारी व तर्कराज भट्टया इजलाशं थ्व निर्णय याःगु खः ।

थुबले तकया दुने नरेन्द्र विक्रम राणां नं थ्व जग्गायात निकू कुचा यानाः भेषराज न्यौपाने (कि. नं. १८४१) व सावित्री तिल्मिसिना (कि. नं. १८४२) यात मीधुंकूगु जुयाच्वन । वयांलि न्यौपाने व तिल्मिसिनां नं थ्व जग्गा येँया स्थानीय जुजुकाजी महर्जन व रत्नकाजी महर्जनयात मिया थकल ।

वि.सं. २०७२ या तःभुखाचय् धरहरा क्वःदःबलय् अन दयेकातःगु टहरा नं स्यन । तर मुस्मांतय्सं हानं टहरा दनेगु ज्या यात । थ्व टहरा दंबलय् उमिसं जग्गाधनीया अनुमति नं मकाः लिसें मनपाय् नक्सा पास नं मयाः । उकिं उमिसं दंगु उगु टहरा थुनेगु कुतः जूगु खः ।

टहरा दनेगु ज्याय् विवाद वयेवं थःपिनि अन्तिम कुतः कथं मुस्मांतय्सं सर्वोच्चया फैसला नं पुनरावेदन याये माल धकाः सर्वोच्चय् छगू निवेदन बिउगु खः । तर मिति २०७५ असार ७ गते कुन्हु सर्वोच्चया न्याम्ह न्यायाधीशपिं ओमप्रकाश मिश्र, केदारनाथ चालिसे, विश्वम्भर प्रसाद श्रेष्ठ, तेजबहादुर केसी व पुरुषोत्तम भण्डारीया वृहत् पूर्ण इजलाशं तह तहलय् फैसला जुजुं वयेधुंकूगु जुयाः थुकी आः पुनरावेदन तयेगु तकं मिले मजू धकाः निर्णय याःगु खः ।

थ्व फैसला लिपा नं टहरा थुनेगु ज्या मजूगुलिं सर्वोच्च अदालतया फैसला कार्यान्वयन निर्देशनालयपाखें वंगु २०७७ श्रावण २९ गते येँ महानगरपालिकायात छपु पौ छ्वसें सर्वोच्च अदालतया फैसला तुरुन्त कार्यान्वयन यानाः उकिया जानकारी बिउ धकाः निर्देशन बियाहःगु खः । फैसला कार्यान्वयन निर्देशनालयया हे उगु निर्देशन कथं शनिवाः अन डोजर लगे यानाः टहरा थुनेगु ज्या जूगु खः ।

मुस्लिम समुदायपाखें थ्व जग्गा थःपिनिगु धकाः नं दावी मयासे सरकारी जग्गा जुइमाः धकाः मुद्दा तःगु खः । तर हरेक मुद्दाय् तह तह थःपिं पराजित जुइवं उमिसं धार्मिक आस्थाया बः कासें थ्व थाय् मुस्मांतय् नमाज ब्वनीगु मस्जिद खः धइगु न्हूगु दावी न्ह्यःने तया हःगु खँ स्थानीय मनूतय्सं धाःगु दु । मुस्मांतय्सं अन ‘मुसफिर मदिनी मस्जिद’ दु धकाः दावी याना हःगु खः । तर उगु थासय् मस्जिद दु धकाः थौं तक थःपिंसं गबलें मन्यनागु खँ स्थानीय मनूतय्सं धाःगु दु ।

थ्व विषययात कयाः कानुनी प्रक्रिया न्ह्यानाच्वंगु ३३ दँ दयेधुंकल । तर मुद्दाया छुं हे भ्वँतय् मस्जिदया नां तकं उल्लेख जुयाच्वंगु मदु । मुद्दाय् बुइधुंकाः तिनि धार्मिक भावनाया बः कयाः थाय् कब्जा यायेगु नियतं उगु थाय्यात मस्जिद दावी याना हःगु खँ धाःगु दु ।

पुलांपिं मनूतय्सं धाःकथं बागदरवारया नापसं च्वंगु उगु जग्गाय् न्हापा मधेशं खसी ज्वना वइपिं मुस्मांत निला स्वलाया लागिं च्वनीगु खः । मधेशं खसी ज्वना वयेबलय् येँय् च्वनेगु थाय् मदु धाःगुलिं राणा शासकतय्सं उमित उगु खुल्ला थासय् च्वनेगु व्यवस्था जक याना तःगु खः । राणातय्त खसी आपूर्ति यायेगु ज्या नं थ्वहे मुस्मांतय्सं याइगु खः ।

टहरा थुनेगु ज्याय् येँ मनपा २२ वडाया अध्यक्षया समेत मिलोमतो दु धइगु द्वपं अन च्वनीपिं मुस्मांतय्सं बियाच्वंगु दु । तर वडा अध्यक्ष चिनीकाजी महर्जनं थःपिंसं स्वयेगु धइगु अदालतया भ्वं खः धासें अदालतं हे उगु थाय् खाली याकि धकाः निर्देशन बिया हयेधुंकाः उकिया पालना यायेगु बाहेक मेगु विकल्प थःपिंके मदुगु खँ कनादिल । अदालतया फुक्क हे तहपाखें पराजित जुइधुंकूगुलिं धर्मया बः कयाः देय्या न्यायालययात हाथ्या बीगु ज्या याये मजिउगु बिचाः नं वय्कलं न्ह्यथनादिल । मुस्लिम समुदायया थ्व ज्यां उगु जग्गाया हकदार जुयाच्वंपिं येँ देय्या स्थानीयवासीयात मर्काय् लाकीगु खँ नं अध्यक्ष महर्जनं कनादिल ।