नेपाःयात ग्रुप ‘बी’या उपाधि

नेपालं वर्ल्डकप क्वालिफायर टी–२० एसिया रिजनया ग्रुप ‘बी’या उपाधि त्याकूगु दु । लिपांगु कासाय् सिंगापुर नाप बराबरी जुइवं निगूलिं टिमं १–१ अंक काःगु खः । नेपाः व सिंगापुर निगूलिं टिमया समान ११–११ अंक जूसां नेट रन रेटया लिधंसाय् नेपालं थ्व उपाधि त्याकूगु खः । नेपाःया रनरेट ७.७८२ दुगु खःसा सिंगापुरया ४.७७२ जक दुगु खः ।

शुक्रवाः जूगु कासाय् सिंगापुरं न्हापांगु ब्याटिङ यानाः नेपाःयात ८२ रनया लक्ष्य बिउगु खः । न्हापां बलिङ याःगु नेपाःया निंतिं सन्दिप लामिछानें ४, करण केसी व सोमपाल कामीं २–२ व बसन्त रेग्मी व लललित राजवंशी १–१ विकेट काःगु खः ।

जवाफी ब्याटिङ याःगु नेपालं मुक्कं स्वंगू बलया जक सामना यायेखन । स्वंगू बलय् छगू विकेट तंकाः छगू जक रन दयेकूवलय् वाः वयाः कासा दिकेमाःगु खः ।

सन्दीपया रेकर्ड
छगू हे अन्तर्राष्ट्रिय धेंधेंबल्लाय् दकलय् अप्व विकेट काइम्ह नेपाःया कासामिया कथं सन्दीप लामिछानें न्हूगु रेकर्ड दयेकूगु दु । सन्दीपं थुगु धेंधेंबल्लाय् खगू कासा म्हिताः २४ विकेट काःगु खः । थ्वस्वयां न्ह्यः थुगु रेकर्ड बसन्त रेग्मी व विनोद दासया नांमय् दुगु खः । रेग्मी व दासं २१–२१ विकेट कयाः रेकर्ड दयेकातःगु खः ।