ने. सं. ११४४ कौलाथ्व चौथी -

अर्जेन्टिनायात अन्तिम मौका

समूह चरणय् थःपिनिगु अन्तिम कासा म्हितेगु झ्वलय् थौं समूह सी पाखें अस्ट्रेलियां पेरु लिसे व फ्रान्सं डेनमार्क लिसे म्हितेत्यंगु दु । अथेहे समूह डीइ आइसल्यान्डं क्रोसिया लिसे व नाइजेरियां अर्जेन्टिना लिसे म्हितेत्यंगु दु । समूह सीइ फ्रान्स ६ अंक कयाः नकआउट चरणय् दुहां वनेधुंकूगु दुसा पेरु थःम्हं म्हितुगु निगुलिं कासा बूगुलिं धेंधेंबल्लाखं पिने लायेधुंकूगु दु ।

थौं अस्ट्रेलिया व डेनमार्कं निगूगु चरणय् वनेगु निंतिं प्रतिस्पर्धा याइगु जुइ । ४ अंक कयाः निगूगु थासय् दुगु डेनमार्कयात फ्रान्सलिसेया थौंया कासा बराबरी जक याःसां मेगु चरणय् दुहां वनेखनी । मेखे अस्टे«लियायात धाःसा पेरुयात बुकेमाःगु जक मखु, फ्रान्सं डेनमार्कयात बुकूसा जक निगूगु चरणय् वनेखनीगु ह्वःताः चूलाइ ।

उकिसनं अस्ट्रेलियायात निगूगु चरणय् वनेगु निंतिं गोल अन्तर अप्वयेकाः त्याकेमाःगु दनि । समूह ‘डी’इ धाःसा थुगु विश्वकपय् अप्वसिया यःगु टिम मध्ये छगू जुयाच्वंगु अर्जेन्टिनायात नकआउटय् दुहां वनेगु निंतिं अन्तिम मौका वयाच्वंगु दु । अर्जेन्टिनां थौं नाइजेरिया लिसे जूगु कासा त्याकेफत धाःसा जक निगूगु चरणय् दुहां वनेफइगु अवस्था जुइ ।

थुकी नं क्रोसियां आइसल्यान्डयात म्होतिं नं बराबरीइ पन धाःसा जक अर्जेन्टिनायात लबः जुइ । यदि आइसल्यान्डं क्रोसियायात त्याकल धाःसा अर्जेन्टिना व आइसल्यान्ड निम्हय् अप्वः गोल थ्वानातःम्ह निगूगु चरणय् दुहां वनीगु जुइ । मेखे क्रोसियां आइसल्यान्डयात बुकल धाःसा नाइजेरियायात धाःसा अर्जेन्टिना लिसे कासा बराबरी जक याःसां निगूगु चरणय् दुहां वनेखनी ।

उकिं थौंया कासा अर्जेन्टिनाया निंतिं तसकं महत्वपूर्ण जुयाच्वंगु दु । अर्जेन्टिनाया न्ह्यःया कासा लिपा प्रशिक्षक जोर्ग साम्पाउली खनाः सकलें असन्तुष्ट जुयाच्वंगु दु । उकिं थौंया कासाय् सुनां सुनां म्हितेगु धयागु खँ हे टिमया वरिष्ठ कासामिपिंसं सहलह यानाः म्हितीगु खँ पिहां वयाच्वंगु दु ।