रोनाल्डोयात कोरोना संक्रमण

एजेन्सी – सुपरस्टार फुटबल कासामि क्रिस्टियानो रोनाल्डोयात नं कोरोना भाइरस संक्रमण जूगु दु। थौंकन्हय् जुभेन्टसपाखें इटलीइ म्हिता वयाच्वंम्ह पोर्चुगिज कासामि रोनाल्डोयाके आःतक छुं नं लक्षण धाःसा खनेमदुनिगु खँ धाःगु दु। अथेखःसां व आः आइसोलेसनय् च्वनाच्वंगु दु ।

कोरोना संक्रमण खनेदयेवं नेसन्स लिग अन्तर्गत म्हिगः जूगु स्वीडेनविरुद्धया कासाय् रोनाल्डों म्हिते मखन। पोर्चुगल फुटबल महासंघया कथं पोर्चुगिज टोलीया मेपिं सकलें कासामितय् रिपोर्ट धाःसा नेगेटिभ वःगु दु। थ्व धेंधेंबल्लाःया आइतवाः फ्रान्स लिसे जूगु कासा धाःसा बराबरीइ क्वचाःगु खः ।

युरोपय् थौंकन्हय् कोरोना भाइरस संक्रमणया निगूगु लहर वयाच्वंगु दु। संक्रमण तच्वया वयेवं नेदरल्यान्डं थीथी प्रतिबन्धया घोषणा याःगु दु। प्रधानमन्त्री मार्क रुटं वइगु प्यवाःया निंतिं आंशिक लकडाउन घोषणा याःगु दसा सार्वजनिक थासय् मास्क अनिवार्य याःगु दु। फ्रान्सय् वंगु वालय् न्हि १७ हजारम्हेसित संक्रमण खनेदुगु खः । स्थानीय संचार माध्यमतय्सं पेरिस लिसें थीथी थासय् चान्हय् कफ्र्यु जुइफुगु खँ धाःगु दु ।

अथेहे जर्मन चान्सलर एगेला मर्कलं युरोपया अवस्था तसकं चिन्तपूर्वक स्वयाच्वनागु खँ धाःगु दु। रुसं नं न्हिं १४ हजारया ल्याखं मनूतय्त संक्रमित जुयाच्वंगु खँ धाःसां राष्ट्रव्यापी लकडाउन धाःसा मयायेगु खँ धाःगु दु ।

सम्बन्धित बुखँ

LEAVE YOUR COMMENTS