फ्रान्स शीर्ष वरियताय्

एजेन्सी- विश्वबिजेता फ्रान्स फिफा वरियताया न्हापागुं थासय् लाःगु दु । रसियाय् जूगु विश्वकप धुंकाः फिफां सार्वजनिक याःगु वरियताय् फ्रान्सं खुगू स्थान च्वय् थहां वयाःगु न्हापांगु थाय् काःगु खः । थ्वयां न्ह्यः फ्रान्स न्हय्गूगु वरियताय् लानाच्वंगु खः । १६ दँ लिपा फ्रान्स न्हापांगु स्थानय् थ्यंगु खः । न्हापांगु स्थानय् लानाच्वंगु जर्मनी धाःसा १५ स्थान कुहां वंगु दु ।

विश्वकपय् सेमिफाइनल थ्यंगु बेल्जियम स्वंगूगु थासं थहां वनाः निगूगु थासय् वःगु दुसा ब्राजिल छगू स्थान कुहां वयाः स्वंगूगु थासय् लाःगु खः । न्हापांखुसी विश्वकपया फाइनलय् थ्यंगु क्रोएसिया प्यंगूगु थासय् लाःगु दु । क्रोएसिया थ्व सिबें न्ह्यः २० औं थासय् लानाच्वंगु खः । फिफां पिकाःगु उत्कृष्ट १० दुने छसिकथं फ्रान्स, बेल्जियम, ब्राजिल, क्रोएसिया, उरुग्वे, इग्ल्याण्ड, पोर्चुगल स्वीजरल्याण्ड, स्पेन व डेनमार्क लाःगु दु । अर्जेन्टिना धाःसा खुगू स्थान कुहां वयाः ११ औं थासय् लाःगु दु । फिफा वरियताय् नेपाल १६१ स्थानय् दु ।