ने. सं. ११४४ कछलागा सप्तमी -

भाइदेगःयात पुलांगु हे स्वरुप बीगु

यल – राणाकालय् स्वरुप हिउगु मल्लकालीन छगः देगः पुलांगु हे अवस्थाय् निर्माण जुइगु जूगु दु । गाबहाःस्थित भाइ देगः झण्डै च्यागू दशक लिपा पुलांगु हे स्वरुपय् हिइकेत्यंगु खः । थ्व देगः वि.सं. १९९० या भुखाचय् क्षतिग्रस्त जूगु पाटन स्मारक तथा दरवार हेरचाह ज्याकूया प्रमुख काजीमान प्याकुरेलं कनादिल । प्यागोडा शैलीया थ्व देगः न्हापा स्वतँ जाःया खः ।

देगः क्षतिग्रस्त जुइवं पुनःनिर्माण लिपा छतँया दयेकूगु खः । आः हाकनं पुलांगु हे शैली व आकारय् लित हयेत्यंगु दु । वय्कलं धयादिल, ‘आः ताःई लिपा हाकनं पुलांगु हे स्वरुपय् लिहां वयेत्यंगु दु ।’देगः न्हापाया हे स्वरुपय् लित हयेत वाङ्मय शताब्दी पुरुष सत्यमोहन जोशीया अग्रसरताय् स्थानीय न्ह्यचिउगु खः ।

यल महानगरपालिकां ५० लाख ग्वाहालि यायेगु प्रतिवद्धता प्वंकूगु दु । गुलिखे स्थानीयं तकं देगः पुनःनिर्माणया निंतिं योगदान बीत्यंगु दु । काठमाडौं उपत्यका संरक्षण कोष (केभिपिटिं) देगः निर्माणय् प्राविधिक ग्वाहालि यानाच्वंगु दु । न्हय्गू दशक न्ह्यःया महाद्यःया थ्व देगः क्षतिग्रस्त जुल । थ्व देगःयात उगु इलय् सामान्य मर्मत यायेगु व पर्केगु ज्या जक जुल ।

उगु ईयापिं मनूतय्सं देगःया वास्तविक रुपं सिउसां न्हू पुस्ताया आपाःसित धाः जानकारी मदुगु प्याकुरेलं कनादिल । आः बुलुहं देगःया वास्तविका शैलीया बारे थीथी आधार लुया वयाच्वंगु दु । गुलिखे देगःया भाग उगु इलंनिसें आतक नं सुरक्षित जुयाच्वंगु दु । देगःया पुलांगु तस्वीरं नं आः दुगु स्वरुप लिपा वयाः हिउगु खः धइगु प्रमाणित याःगु दु ।

वय्कलं धयादिल, ‘लुया वःगु प्रमाणया लिधंसाय् न्हापायागु थेंज्याःगु हे दयेकेत ग्वाहालि जूगु दु ।’उगु इलय् अःपुकेत धकाः स्वरुप स्यंकाः पुनःनिर्माण याःगु प्रमुख प्याकुरेलं कनादिल । आः थेंज्याःगु प्रविधि मदुगुलिं न्हापा उपलब्ध स्रोतसाधन व जनशक्तिपाखें हे ज्या जूगु खनेदु । वय्कलं धयादिल, ‘उगु इलय् धायेसातं दयेकेत आवश्यक ज्वलं चूलाके अःपु मजू ।’

२०७२ सालया भुखाचं यानाः थ्व देगः पुनःनिर्माण यायेगु ज्या लिज्याः वंगु खः । भुखाय् लिपा सकसिगुं ध्यान थन स्वयां नं यल लाय्कू क्षेत्रया स्मारक व मेमेगु स्मारकय् लानाच्वंगु प्याकुरेलं धयादिल । वय्कलं धयादिल, ‘ताःईतक थ्व देगःया पुनःनिर्माया अन्योलय् लानाच्वंगु खः ।’ मेमेगु थासय् पुनःनिर्माण न्ह्यायेवं नापनापं आः थनया पुनःनिर्माणया निंतिं स्थानीय थः हे न्ह्यचिउगु दु ।

स्थानीय तहं थ्व स्वयां न्ह्यःया दँय् म्हो जक बजेट फ्याःगुलिं यक्व ज्या याये मफयाच्वंगु खः । थुगु दँय् नगर प्रमुख चिरिबाबु महर्जनं देगः पुनःनिर्माणया निंतिं ५० लाख बीगु घोषणा यानादीगु दु । आर्थिक व प्राविधिक निगुलिं ग्वाहालिं यानाः पुनःनिर्माणय् तीव्रता काःगु प्याकुरेलं धयादिल ।