ने. सं. ११४३ ञलाथ्व चतुर्दशी -

थुगुसी यँयाः जात्रा याये मालीगु सुझाव

येँ – कोरोना महामारीया कारणं निदँ तक दिनाच्वंगु येँ देय्या तःजिगु यँयाः जात्रा थुगुसी न्यायेकेमाःगु सः पिहां वःगु दु । थुगुसीया यँयाः जात्रा छु यायेगु धइगु बारे सहलह यायेत इन्द्रजात्रा व्यवस्थापन समितिं सःतूगु मुँज्याय् सहभागी जूपिं थीथी वडाया स्थानीय बुद्धिजीवीतय्सं थुगुसी आवश्यक स्वास्थ्य मापदण्ड व सुरक्षा व्यवस्था यानाः यँयाः जात्रा न्यायेके माली धइगु सुझाव बिउगु खः ।

मुँज्याय् ब्वति काःपिं बुद्धिजीवीतय्सं थुगुसी यँयाः जात्रा अनिवार्य रुपं यायेगु तर उकिया स्वरुप धाःसा कोरोना महामारीया रूप गुकथं न्ह्याः वनी उकियात स्वयाः निर्धारण याये माली धइगु सुझाव नं बिउगु खः । छुं जुयाः महामारी तच्वयाः सरकारं पूर्ण लकडाउन यात धाःसा स्वरुप हिलाः जूसां जात्रा याये माःगु खँ अन पिहां वःगु खः । पूर्ण लकडाउन मतःसां नं जात्रा यायेगु खःसा स्वास्थ्य मापदण्ड पालना यानाः भीडभाड म्हो जुइ कथं जात्रा याये मालीगु सुझाव नं मुँज्याय् वःगु खः ।

मुँज्याया सहभागीतय्सं आः सरकारी निकायय् खँ तयेबलय् जात्रा यानां तुं त्वःतेगु तर उकिया स्वरुप छु याःसा जी धकाः जक सल्लाह यायेमाःगु सुझाव नं व्यवस्थापन समितियात बिउगु खः ।

व्यवस्थापन समितिया नयाः गौतमरत्न शाक्यं थुगुसी यँयाः जात्रा छु जुइ धकाः आपालं भक्तजनतय्सं न्यना हःगु कारणं हे सहलह यायेत थ्व मुँज्या तयागु खँ कनादिल । वय्कलं धयादिल, ‘आः थ्व मुँज्यापाखें वःगु सुझावया आधारय् हे थीथी थासय् खँ तयेगु जुइ । यँयाः जात्राय् यक्व गुथि, खलःया सहभागिता दु । उकिं वय्कःपिंलिसे नं खँ ल्हाये मानि । वयां लिपा जक ठोस निर्णय यायेगु जुइ । अय्नं यँयाः जात्रा न्यायेकेमाः धइगु प्रारम्भिक सुझाव वःगुलिं जिमिसं वहे कथं खँ न्ह्याकेगु जुइ ।’

कोरोना महामारीया दथुइ नं येँय् जनबहाःद्यःया जात्रा, ख्वपय् बिस्काः जात्राया नापं थीथी राजनीतिक पार्टीतय्गु सभा सम्मेलन समेत जूगु कारणं स्वास्थ्य मापदण्डया पालना यात धाःसा यँयाः जात्रा नं याये फइगु तर्क सहभागीतय्सं बिउगु खः ।