बार्सिलोनाया विजयय् मेसीया निगू गोल
एजेन्सी- बार्सिलोनां च्यापियन्स लिगया थःगु निगूगु कासाय् टोटनह्यामयात बुकूगु दु । कासाया न्हापांगु हाफय् निगू व लिपांगु हाफय् निगू गोल यासें टोटनह्यामयात घरेलु मैदानय् ४–२ गोलं बुकूगु खः । बार्साया निंतिं कप्तान लियोनल मेसी उत्कृष्ट कासा न्ह्यब्वसें निगू गोल यायेवं विजय सम्भव जूगु खः । समुह ‘बी’ अन्तर्गत जूगु कासाय् बार्सिलोना निगूगु मिनेटय् फिलिप काउटिन्होया गोलं अग्रता कायेधुंकूगु खः । थ्व लिपा २८ औं मिनेटय् इभान राकिटिक थप छगू गोल यायेवं बार्सा निगू गोलं न्ह्यःने लात ।
निगूगु हाफया ५२ औं मिनेटय् टोटनह्यामया निंतिं ह्यारी केनं गोल यासें अन्तर म्हो यानाबिल । तर थ्वयां प्यंगू मिनेट लिपा हे मेसीं गोल यानाः बार्सिलोनायात हाकनं निगू हे गोलं अग्रता बिल । टोटनह्यामया एरिक लामेलां ६६ औं गोल यानाः हाकनं गोल अन्तर कम याःगु खःसा अन्तिम इलय् मेसीं थःगु व्यक्तिगत निगूगु गोल यासें टोटनह्यामयात ४—२ गोलं बुकाबिल । थ्व समूहया मेगु कासाय् इन्टर मिलान एन्डहोभनयात २–१ गोलं बुकूगु खः।
अथेहे समुह सी अन्तर्गत जूगु कासाय् पिएसजीं रेड स्टार बेलग्राडयात ६–१ गोलया तःधंगु अन्तर बुकल । पिएसजीपाखे ब्राजिलया स्टार नेयमारं ह्याट्रिक यात । नेयमारं न्हापांगु हाफय् निगू व निगूगु हाफय् छगू गोल याःगु खः। पिएसजीया निंतिं थप स्वंगू गोल एडिसन कभानी, डि मारिया व केलियन एमबाप्पे यात । रेड स्टार पाखें छगू जक गोल मार्को मरिनं याःगु खः । ह्याट्रिकया लिसें नेयमार च्यापियन्स लिगय् दकलय् अप्वः गोल यानातःम्ह ब्राजिलियन कासामिया ल्याखं काकाया बराबरी याःगु दु । समुह सीया मेगु कासाय् लिभरपुलयात इटालियन क्लब नेपोली १—० गोलं बुकूगु दु । कासाया छगू जक गोल निगुगू हाफया अन्तिम इलय् लोरेन्जो इन्सिग्ने याःगु खः । लिभरपुलं नेपोलीया पोष्टय् छगू नं बांलाःगु प्रहार याये मफुगु खः । नेपोली समुहया शीर्ष थासय् दु ।
अथेहे समुह ‘ए’या कासाय् एथ्लेटिको म्याड्रिडं क्लब ब्रुगेसयात ३—१ गोलं बुकल । एथ्लेटिकोया निंतिं एन्टोनी ग्रिजम्यानं निगू व कोकें छगू गोल याःगु खः । क्लब ब्रुगेसया पाखें ड्यान्जुमा ग्रोएनिभेल्डं छगू गोल याःगु खः । न्हापागु हाफ १–१ गोलया बराबरीइ क्वचाःगु खःसा एथ्लेटिकों निगूगुय् हाफ थप निगू गोल याःगु खः । थ्व हे समूहय् लाःगु बोरुसिया डर्टमुनं मोनाकोयात ३–० गोलं बुकूगु दु । डर्टमन समुहया शीर्ष थासय् दु ।
समुह डी या कासाय् एफसी पोर्टो गालाटासारेयात १–० व शाल्कें लोकोमोटिभ मस्कोयात १—० गोलं बुकूगु दु ।
LEAVE YOUR COMMENTS