थ्रीस्टारयात बुढा सुब्बा गोल्डकप

बुढा सुब्बा गोल्डकप फुटबलया उपाधि रुस्लान थ्रीस्टारं त्याकूगु दु । धरानय् न्ह्यानाच्वंगु २० क्वःगु रेडबुल बुढा सुब्बा गोल्डकप फुटबल अन्तर्गत थौं उपाधिया निंतिं जूगु फाइनलय् थ्रीस्टारं चिरप्रतिद्वन्द्वी विभागीय टीम नेपाल पुलिसयात १–० गोलं बुकूगु खः ।
थ्रीस्टारया निंतिं छगू जक निर्णायक गोल न्हापांगु हाफया अतिरिक्त इलय् अजायी मार्टिन्सं याःगु खः । निर्धारित ४५ मिनेटया कासा गोलरहित बराबरी जुयाच्वंगु इलय् इन्ज्युरी टाइमय् मार्टिन्सया गोलं थ्रीस्टारं उपाधि त्याकेगु निश्चित याःगु जक मखसे पुलिसयात बदला नं काःगु दु ।
करिब छवाः न्ह्यः पोखराय् जूगु आहा रारा गोल्डकप फुटबलया फाइनलय् पुलिसं थ्रीस्टारयात १–० गोलं हे बुकाः उपाधि त्याकूगु खः ।
विजय लिपा उपाधिलिसें खुगू लाख तका दां नं त्याकूगु थ्रीस्टारं थुगु उपाधि थ्व स्वयां न्ह्यः प्यक्वःतक त्याके धुंकूगु दु । थ्रीस्टारं थ्व हे माघया न्हापांगु वालय् दकलय् अप्वः राशिया इटहरी गोल्डकप त्याकूगु खः ।
(किपा साभार ः गोलनेपाल डटकम)