हानं लकडाउन याये मालेफु

येँ- नेपालय् कोरोना भाइरसया संक्रमण अप्वया वन धाःसा उकियात पनेगु निंतिं हाकनं लकडाउन याये मालीगु अवस्था वये फइगु खँ स्वास्थ्य मन्त्रालयया सहप्रवक्ता डा. समीरकुमार अधिकारीं धयादीगु दु । म्हिगः मन्त्रालयं ग्वसाः ग्वःगु नियमित पत्रकार सम्मेलनय् न्ववासें वय्कलं उगु खँ धयादीगु खः ।

वय्कलं कनादी कथं थौंकन्हय् स्वनिगलय् संक्रमण अप्वया वनाच्वंगु मू कारण म्वाःसां म्वाःसां यानाच्वंगु भिडभाड, मास्क तयेत क्यनाच्वंगु अनिच्छा, सामाजिक दूरी कायम मयाइगु व अप्वया वनाच्वंगु भ्वय् खः ।

वय्कलं धयादिल, ‘लकडाउन यायेगु सरकारया आज्जु मखु, तर सरकारं परिस्थिति कथं नीतिगत निर्णय यानाः संक्रमणया चक्र पनेमाः, संक्रमण नियन्त्रण यायेत जूसां ‘लकडाउन’ यायेमालीगु अवस्था वयेफु ।’ वय्कलं आः न्ह्यःने वयाच्वंगु होलि नं छेँय् च्वनाः जक न्यायेकेत व सतकय् वयाः भिडभाड मयायेत इनाप यानादीगु दु । भारतय् न्यना वनाच्वंगु संक्रमण नेपालय् दुहां मवयेमा धकाः भारतलिसे स्वाःगु नाका सुरक्षा व हेल्प डेस्क सक्रिय रुपं सञ्चालन यायेत निर्देशन बीधुनागु खँ नं कनादिल । वय्कःया कथं भारतय् कोरोना संक्रमणया ल्याः अप्वयेवं नेपाः लिहां वइपिनिगु भिड नं अप्वया वनाच्वंगु दु । उकियात पनेत नं स्वास्थ्य मापदण्ड नालेत निर्देशन बीधुंकूगु दु ।

भारतया थीथी राज्यय् कोरोना संक्रमण अप्वयेवं विज्ञतय्गु सुझाव कथं सरकारं उगु निर्देशन जारी याःगु खः । नेपाःलिसे स्वाःगु भारतया उत्तर प्रदेश, बिहार व पश्चिम बंगालय् कोरोना संक्रमणया ल्याः अप्वया वनाच्वंगु दु । उकथं हे स्वनिगलय् नं वंगु छवाःया दुने संक्रमित अप्वया वनाच्वंगु दु ।

भारतय् लिसे नेपालय् संक्रमित अप्वया वनाच्वंगु मू कारण न्हूगु भेरियन्ट जुइ फइगु आशंका नेपाःया विज्ञपिंसं याःगु दु ।
विश्वव्यापी रुपं कोराना भाइरसया खोप विकास जुइवं आपालं मनूतय्सं स्वास्थ्य मापदण्ड नालेगु ज्या त्वःतूगुलिं यानाः आः विश्वन्यंकं हे कोरोना भाइरसया न्हूगु भेरियन्ट विकास जूगु खः । गुकिं यानाः आः छक्वः हाकनं विश्व हे कोरोना भाइरसं प्रभावित जुइ फइगु खँ स्वास्थ्यविद्तय्सं धाःगु दु ।

थ्वहे झ्वलय् लिपांगु नीप्यघौया दुने नेपालय् १४५ म्ह कोरोना संक्रमण पुष्टि जूगु दु । सहप्रवक्ता अधिकारीया कथं देय्न्यंकं प्रयोगशालाय् याःगु ३९६३ नमूना परीक्षणय् १४५ म्ह संक्रमित लूगु खः । उकी मध्ये स्वनिगलय् जक ६३ म्ह संक्रमित थप जूगु दु । उकी नं येँय् जक ५३ म्ह, यलय् च्याम्ह व ख्वपय् निम्ह संक्रमित लूगु खः ।

उकथं हे प्रतिनिधिसभा, शिक्षा तथा स्वास्थ्य समिति अन्तर्गतया उपसमितिं संक्रमण व महामारी भविष्यय् वये फइगु सम्भावनायात ध्यानय् तयाः उपचार यायेत व संक्रमण नियन्त्रणया निंतिं झिंच्यागू बुँदे सुझाव बिउगु दु ।

कोरोना भाइरस कोभिड–१९ सम्बन्धय् सरकारं याःगु ज्याया बारे अनुगमन यायेत नीस्वंगु उपसमितिं म्हिगः थःगु प्रतिवेदन न्ह्यब्वसें देय्न्यंकंया अस्पतालय् संक्रमण रोग सम्बन्धी निश्चित शड्ढयाया एकाइ व्यवस्थापन यायेत नं सुझाव बिउगु दु । सिंहदरवारय् म्हिगः च्वंगु बैठकय् उपसमितिया संयोजक जीवनराम श्रेष्ठं समितिया सभापति जयपुरी घर्तीयात अध्ययन प्रतिवेदन हस्तान्तरण यायेगु झ्वलय् उगु सुझाव बिउगु खः ।

आइसोलेसन दयेकेगु तयारी

थ्वहे झ्वलय् गृह मन्त्रालयं देय्न्यंकंया क्वारेन्टाइन व आइसोलेसन सेन्टर अवस्थाया बारे विवरण मुंकेगु ज्या शुरु याःगु दु । भारतय् कोरोना भाइरसया संक्रमण अप्वयेवं नेपालय् नं क्वारेन्टाइन व आइसोलेसन मालेफु धासें विवरण संकलन यायेगु ज्या न्ह्याकूगु खँ मन्त्रालयया प्रवक्ता चक्रबहादुर बुढां कनादीगु दु । वय्कलं देय्न्यंकंया ७७ जिल्लाया क्वारेन्टाइन व आइसोलेसन सेन्टरया बारे विवरण अपडेट याकेगु निंतिं परिपत्र यानागु खँ धयादीगु दु ।

वय्कलं धयादिल, ंस्वास्थ्य मन्त्रालयया विज्ञप्तियात ग्वाहालि जुइ कथं भिडभाड जुइगु व अप्वः मनू मुनीगु गोष्ठी नं मयायेत धयागु, लिसें थ्वहे विषययात कयाः जिल्ला संकट व्यवस्थापन केन्द्रयात जानकारी याकेत नं धयागु दु ।’पतिइ सीमा नाकाय् वये–वने याइपिनिगु अभिलेख तयेत व स्वास्थ्य जाँच यायेत नं निर्देशन बियागु खँ वय्कलं धयादीगु दु ।