नेवाः नसा नखतय् झ्वःभ्वय्

येँ(नेपालभाषा टाइम्स)- काभे्र जिल्लाया प्रमुख सहर भ्वँतय् ‘काभ्रेपलाञ्चोक फुड फेस्टिभल’ ज्याझ्वःया ग्वसाः ग्वःगु दु । परम्परातगत नेवाः नसाज्वलंलिसें कला, संस्कृति, तिसावसः व स्वच्छ नसा ज्वलंया प्रवद्र्धन यायेगु उद्देश्यं उगु ज्याझ्वःया ग्वसाः ग्वःगु खः ।

फुड फेस्टिभलय् मौलिक नेवाः पहया झ्वःभ्वय् (सुकूभ्वय्) व सांस्कृतिभ ज्याझ्वः नं याmगु दु । निन्हुयंकं जूगु उगु ज्याझ्वः भ्वँतया अरनिको पार्टी प्यालेसय् जूगु खः । नेवाः नसा नखः रेडक्रस चोकनिसें भिंद्यःयाथाय्तक लाःगु लँपुइ ग्वसाः ग्वःगु खःसा झ्वःभ्वय् पार्टी प्यालेसय् याःगु खः ।

भ्वँत नगरपालिकाया प्रमुख शान्तिरत्न शाक्य व उपप्रमुख विमला सापकोटां बेलुन ब्वयेकाः मंकाःकथं उगु ज्याझ्वःया उलेज्या यानादीगु खः । काभ्रेपलाञ्चोक होटल तथा रेष्टुराँ व्यवसायी संघ व पार्टी प्यालेस तथा क्याटरिङ संघया मंकाः ग्वसालय् जूगु ज्याझ्वलय् थीथीकथंया सांस्कृतिक झाँकीया ब्वज्या नं न्ह्यब्वःगु खः । ग्वसाः खलकं बिउगु जानकारीकथं महोत्सवय् ५० गू स्वयां अप्वः थीथी नेवाः नसाज्वलंया स्टल तःगु खः ।

होटल तथा रेष्टुराँ व्यवसायी सङ्घया जिल्ला अध्यक्ष श्यामकुमार भालुं महोत्सवय् ५० गुलिं मल्याक नेवाः नसा ज्वलंया स्टल दुथ्याःगु जानकारी बियादीगु दु । वय्कलं थुपिं निगुलिं संघया मंकाः ग्वसालय् असोजनिसें मंकाः कथं लय्पतिकं ‘फुड फेस्टिभल’ ग्वसाः ग्वयेगु नं जानकारी बिउगु दु ।

भ्वँतया नसाज्वलं महोत्सव क्वचायेवं असोजय् ज्याझ्वः ग्वसाः ग्वयेगु थाय् ल्ययेगु ल्याखं मंकाःकथं योजना दयेकाः वनेगु वय्कलं कनादिल । वय्कःयाकथं जिल्लाया मेगु थासय् यायेगु थुकथंया महोत्सवय् नं भ्वँतय् जूगु थेंज्याःगु हे प्रकृतिया ज्याझ्वः यायेगु ग्वसाः दुगु वय्कलं धयादिल ।

थ्व हे झ्वलय् असोज १९ निसें भ्वँतय् सांस्कृतिक, परम्परागत, व्यापारिकलिसें मनोरञ्जनात्मक कासात नं दुथ्याकाः ‘प्यक्वःगु बनेपा महोत्सव–२०८०’ यायेत्यंगु दु ।