पुलांम्ह वाईसीएलया न्हूगु अभियान

येँ – माओवादी केन्द्र त्वःताः अलग्ग जूम्ह वाइसीएलया पुलांम्ह महासचिव चन्द्रबहादुर थापा सागरं आः रोजगारीया माग यासें येँय् छगू तःधंगु प्रदर्शन यायेत्यनागु खँ कनादीगु दु । माओवादी त्वःतेधुंकाः आः थःपिं ‘राष्ट्रवादी केन्द्र नेपाल’ नामं हानं संगठित जुयाच्वनागु खँ कँसें आः वय्कलं आः देशय् सकलें ल्याय्म्हतय्त रोजगारीया ग्यारेन्टी लिसें शिक्षा व स्वास्थ्य सेवा निःशुल्क यायेमाःगु माग यासें प्रदर्शनया तयारी यानाच्वनागु खँ कनादिल ।

‘नेपालभाषा टाइम्स’ लिसे संक्षिप्त खँल्हाबल्हा यासें वय्कलं थ्वहे वइगु वैशाख १५ गते येँया भृकुटीमण्डपं निसें बसन्तपू तक तःधंगु ¥याली पिकयाः सरकारयात दबाब बीगु खँ कनादिल ।

देशय् राजनीतिक लगायत न्ह्यागु हे कथंया परिवर्तनया खँ ल्हायेगु धइगु वास्तवय् कर्पिनि झोला क्वबीगु जक ज्या खः धासें वय्कलं आः कर्पिनिगु लागिं मखु थःपिनिगु लागिं हे थःपिंसं संघर्ष यायेमाःगु खँ नं कनादिल ।

वय्कलं नेपालय् उद्योग, प्राकृतिक श्रोत, जलश्रोत, पर्यटन आदि आपालं उद्योगया प्रशस्त सम्भावना दुगुलिं यदि राज्यं चाहे जुल धाःसा देशय् दक्व ल्याय्म्ह– तय्त विदेश वने म्वायेक थन हे तयाः रोजगारी बी फइगु दावी नं यानादिल ।