भैलःखः हानं चकनाचुर
ख्वप- बिस्काःया झ्वलय् थुगुसी ख्वपय् लिपांगु दिं बैशाख ५ गते बहनी लिबाक तक भैलःखः सालेगु झ्वलय् खःया नितँ पौ हे लिहांवःगु दु । थःनेपाखे भैलःखः सालेगु झ्वलय् गोल्मढी तक हयाः लित यंकेगु झ्वलय् सुखुध्वाखाया चण्डेश्वरी वनेगु गल्लिइ थ्यनेवं छेँय् न्यानाः उकिया नितँ पौ छ्वम्र्हू वंगु खः । अथे खःसां उकी लानाः छुं अप्रिय घटना धाःसा मजुल । गजू सहित नितँ नापं
छ्वम्र्हुक भैलःखः स्यंगु सम्भवतः थ्वहे न्हापांखुसी खः । अज्याःगु घटना आः तक गबलें हे मजूगु खँ ख्वपय् बय्बय् जुयाच्वंगु दु । थुगुसी भैलःखः नं क्वःने हे स्यंकेत्यंगु दु ।
आः भैलःखःयात तेखापुखुली थ्यंकाः त्वःतातःगु दु । लिपांगु दिं टौमढी थ्यनेवं भैलःखः जात्रा क्वचायेकेमाःगु खःसां चान्हय् १२ बजे तक थःनेपाखे लानाच्वंगु भैलखः क्वःनेपाखे न्ह्याना वनेवं हे टौमढीइ मदिकुसे हाकनं सुरुं थें यानाः अय्सामरी कुंचाय् खः फहीकाः सातुसालाः क्वःनेपाखे यंकेत ताःलाःगु खः । चान्हय् २ बजे भैलःद्यः व बेताल भैरवया न्हूगु मूर्ति लिकया हयेवं जात्रा क्वचाःगु खः । वयां लिपा द्यः थहां बिज्यायेकेगु विधि क्वचायेकूगु खः । भैलःखः आः तेखापुखुली दु । जात्राया झ्वलय् म्हीग हानं अप्पां कयेकाः ल्वापु जुयाः छुं मनूत घाःपाः नं जूगु दु ।
LEAVE YOUR COMMENTS