संखुवासभाय् लाखे जात्रा
येँ (नेपालभाषा टाइम्स)÷प्रदेश नं १या संखुवासभाय् लाखे जात्रा शुरु जूगु दु । नेवाः समुदाय दुने अतिकं महतवपूर्ण पर्वमध्ये छगू थनया लाखे जात्रा नागपंचमिनिसें शुरु जूगु खःसा कृष्ण जन्माष्टमितक न्ह्याइ ।
वंगु छुं दँ थुखे कोरोना संक्रमण व थीथी कारणं लाखे पिथनेगु ज्या दिनाच्वंगु खःसा थुगुसी थीथी थासय् च्वंगु भिंद्यःया देगलय् विधिवत पुजा यानाः लाखे प्याखं पिथंगु खः ।
स्थानीय ल्याय्म्हतय्सं खास चिउताः मक्यंगुलिं यानाः लिपांगु इलय् लोप जुइगु अवस्थाय् थ्यंगु लाखे प्याखंया नेवाः देय् दबू संखुवासभाया संयोजनय् हाकनं पिथनेगु ज्या जूगु खः । लाखे प्याखं संरक्षणया निंतिं हे देय् दबू संखुवासभाया संयोजनय् प्याखं पिथंगु खः ।
लिपांगु इलय् लाखे प्याखंप्रति न्हू पुस्ताया चिउताः म्हो जुया वंगुलिं थुगुसी देय् दबूया हे संयोजनय् प्याखं पिथनागु नेवाः देय् दबू संखुवासभाया नायः मय्जु सीता श्रेष्ठं कनादिल ।
संखुवासभा जिल्लाय् नेवाःतय् बाहुल्यता दुगु खाँदवारी, चैनपुर, सिभुवा, स्याबुन, तुम्लिङटार आदि थासय् थीथी क्लब, संघसंस्थापाखें लाखे प्याखं क्यनेगु याना वयाच्वंगु खःसा थुगुसी धाःसा देय् दबूया हे संयोजनय् प्याखं क्यनेगु वय्कलं कनादिल ।
जिल्लाय् थीथीकथंया लाखे प्याखं क्यनेगु याना वयाच्वंगु व थौंया न्हू पुस्तायात उकिया जानकारी मदुगुलिं लाखे प्याखंया महत्व कनेगु नापं उकिया प्रशिक्षण नं बीगु याना यंकल धाःसा न्हू पुस्ता थुखेपाखे आकर्षित जुइगु विश्वास स्थानीय पुष्पबहादुर श्रेष्ठं कनादिल ।
लाखे प्याखंया निंतिं आपालं खर्च माःगुलिं प्याखं क्यनेगु झ्वलय् आर्थिक संकलन नं यायेगु व उकियापाखें प्याखं क्यनेत लगे जूगु खर्च कटे यानाः ल्यं दुगु ध्यबा प्याखंयात माःगु हलंज्वलं न्यायेत खर्च याना वयाच्वंगु दु ।
LEAVE YOUR COMMENTS