सम्पदा पुनःनिर्माण मापदण्ड कथं जुइमाः : अधिकारी
ख्वप – तःभुखाचं क्षति जूगु सम्पदा पुनःनिर्माणं खास हे गति काये फयाच्वंगु मदु । सम्पदा पुनःनिर्माणया निंतिं सम्बन्धित निकाय, सरोकारवालातय्सं आपालं चिउताः क्यना वयाच्वंगु खःसां गुकथं गति काये माःगु खः, उकथं काये फयाच्वंगु धाःसा मदु । सांस्कृतिक, धार्मिक, ऐतिहासक सम्पदा याकनं पुनःनिर्माण यायेमाःगु खँ भुखाय् ब्वःगु इलंनिसें हे पिहां वयाच्वंगु खः ।
थ्व हे झ्वलय् हाकनं छक्वः सम्पदा पुनःनिर्माण याकनं जुइमाःगु खँ पिहां वःगु दु । संस्कृति, पर्यटन व नागरिक उड्डयन मन्त्री रवीन्द्र अधिकारीं विनाशकारी तःभुखाचं क्षति जूगु सम्पदा पुनःनिर्माण फक्व याकनं यायेमाःगु खँ धयादीगु दु ।
मन्त्री अधिकारीं पुरातत्व विभाग स्मारक संरक्षण तथा दरवार हेरचाह ज्याकू ख्वपपाखें विश्व सम्पदाया धलखय् दुथ्यानाच्वंगु चाँगुनारायण देगः परिसरय् ग्वसाः ग्वःगु क्षमा पुजा ज्याझ्वःया इलय् सम्पदा पुनःनिर्माण यायेबलय् युनेस्को व पुरातत्व विभागया मापदण्ड दुने च्वनाः यायेमाःगु खँय् बः बियादीगु दु । उगु इलय् मन्त्री अधिकारीं चाँगुनारायण देगःया जःखः पुनःनिर्माण जुइ ल्यं दुगु सतः लगायत मेमेगु थासय् नं याकनं पुनःनिर्माणया निंतिं मन्त्रालयं पहल यायेगु जुइ धयादिल ।
मन्त्रालयया सचिव कृष्णप्रसाद देवकोटां सम्पदा पुनःनिर्माणया ज्या याकनं यायेत मन्त्रालयं थःगु थासं पहल यानाच्वंगु दु धयादिल । चाँगुनारायण नगरपालिका ४ वडाअध्यक्ष बुद्धिलाल महर्जनं चाँगुनारायण परिसर दुने च्वंगु सतः पुनःनिर्माण मजूगुलिं अन वइपिं भक्तजन व तीर्थयात्रीतय्त च्वनेगु थाय् मदयाः समस्या जुयाच्वंगु धयादिल ।पुरातत्व विभागया महानिर्देशक भेषनारायण दाहालं सिँया अभावं पुनःनिर्माणय् समस्या जुयाच्वंगु धयादिल ।
LEAVE YOUR COMMENTS