
येँ (नेपालभाषा टाइम्स)- येँया हनुमानध्वाखा लाय्कू दुने च्वंगु शार्दूल जंग गुल्मया पुलांम्ह गुल्मपति प्रमुख सेनानी विकास शाक्यं हनुमानध्वाखा दुने च्वनीपिं सैनिकतय्सं केवल सैनिक ज्याखँ जक यायेगु मखुसें थनया संस्कृति व सम्पदाया मर्मयात नं थुइकाः ज्याखँ यायेमाःगु खँ कनादीगु दु ।
शार्दूल जंग गुल्मयात येँया जात्रा पर्वय् नं सहभागी जुइगु जिम्मेवारी दुगु खँ कँसें वय्कलं धयादिल, ‘हनुमान– ध्वाखा येँया दथुइ लाःगु थाय् जूगुलिं गुल्मया सैनिक जवानतय्सं थनया स्थानीय जनतालिसे समन्वय यानाः ज्या यायेमाः ।’
स्थानीय जनतालिसे जानाः ज्या यायेगु झ्वलय् थ्व गुल्मया सैनिकतय्सं सम्पदा क्षेत्रय् पार्किङ बन्द याकेगु, म्वाःमदुगु सवारी साधन निषेध याकेगु, थाय्थासय् गमला तयाः स्वां पीगु, गमलाय् रंग पायेगु, ल्वहंहिति यचुपिचु याः वनेगु, विदेशी पाहां वइगु जुल कि कुमारी चुक सफा याः वनेगु ज्या यानाच्वगु खःसां थःपिंसं गबलें नं उकिया प्रचार यानाः जस कायेत मस्वयागु खँ नं वय्कलं कनादिल ।
शार्दूल जंग गुल्मपाखें सैनिकतय्त बिउगु बेकरी तालिमया समापन ज्याझ्वलय् न्ववासें वय्कलं उगु खँ कनादीगु खः ।
वर्तमान गुल्मपति सेनानी पूर्ण प्रजापतिं गुल्मपाखें स्थानीय जनतालिसे समन्वय यानाः ज्या यायेगु व सेनायात धिमे प्रशिक्षण बीगु ज्यायात निरन्तरता बियाच्वनागु खँ कनादिल । थौंकन्हय् वय्कःया पहलय् गुर्जुया पल्टनयात धिमे स्यनेगु ज्या जुयाच्वंगु दु । स्यनेगु ज्या गुरु सुदन मुनिकारं यानादीगु खः ।
ज्याझ्वलय् न्ववासें बेकरी तालिमया प्रशिक्षक सजना नकर्मीं थन काःगु तामिलयात सैनिक जवानतय्सं न्ह्यागु थासय् च्वनाः नं उपयोग याये फइ धासें भविष्यय् वनाः थुकिया व्यवसाय समेत याये फइगु खँ कनादिल ।
वय्कलं सेनाया १९ म्ह जवान लिसें स्थानीय त्वाःबहाःया प्यम्ह मिसापिं नापं यानाः २३ म्हेसित झिन्हु तक बेकरीया तालिम बियादीगु खः । म्हिगः बेकरीया समापन व धिमेया आरम्भ याःगु खः ।
LEAVE YOUR COMMENTS