मेरिल्याण्डय् यँयाः हनेगु तयारी

येँ(नेपालभाषा टाइम्स)-अमेरिकाया मेरिल्याण्ड राज्यय् नं यँयाः नखः हनेगु तयारी जुयाच्वंगु दु । राज्यय् च्वना च्वंपिं नेवाःतय्सं यँयाःबलय् येँय् थें हे कुमारिया खः सालाः यँयाः हनेगु तयारी यानाच्वंगु खः ।

नेवाः अर्गनाइजेसन अफ अमेरिकाय् (एनओए)या ग्वसालय् थ्व हे वइगु सेप्टेम्बर २१ शनिवाःकुन्हु येँय् यँयाःबलय् थें हे कुमारि माजुया खः सालाः यँयाः न्यायेकेगु तयारी यानाच्वंगु खः । नेपालं पिने कुमारि माजुया खः सालाः यँयाः न्यायेकेत्यंगु अमेरिका निगूगु मेगु देय् खः । थ्व स्वयां न्ह्यः भारतया सिक्किमय् च्वंपिं नेवाःतय्सं न्हापांखुसी कुमारि माजुया खः सालाः यँयाः न्यायेकेगु शुरु याःगु खः ।

एनओएया स्थापना निगू दशक स्वयां न्ह्यः जूगु खः । थौं स्वयां २३ दँ न्ह्यः नेवाः भाय्, कला, संस्कृतियात प्रवद्र्धनलिसें न्हू पुस्तायात जानकारी बीगु ल्याखं नीस्वंगु एनओएं वंगु झिंनिदँ न्ह्यःनिसें थीथी ज्याझ्वः यानाः यँयाः हना वयाच्वंगु दु ।

मेरिल्याण्डय् यँयाः नखः हनेगु झ्वलय् थुगुसी कुमारिया खः सालेगु नापं लाखेप्याखं, पुलुकिसि प्याखंया नं प्रदर्शन यायेगु तयारी यानाच्वंगु दु । सेप्टेम्बर २१ कुन्हु मेरिल्याण्डया ब्ल्याक हिल रिजनल पार्कय् न्हिनसिया १२ ताःई निसें सनिलया ५ ताःई तक यँयाःया ज्याझ्वः जुइगु ग्वसाः खलकं जानकारी बिउगु दु । अथे हे थीथी सांस्कृतिक ज्याझ्वः न्ह्यब्वयेगु नापं ब्वति कयादीपिंत समय्बजि नं नकीगु जूगु दु ।

सम्बन्धित बुखँ

LEAVE YOUR COMMENTS