फ्रान्स व बेल्जियम विश्वकपय् छनोट

एजेन्सी- साविक विजेता फ्रान्स व विश्वया नं १ टिम बेल्जियम विश्वकपय् छनोट जूगु दु । विश्वकपया युरोपियन छनोट अन्तर्गत शनिवाः बहनी जूगु कासाय् फ्रान्सं कजाकिस्तानयात व बेल्जियमं इस्टोनियायात बुकाः विश्वकपय् थाय् दयेकूगु खः । थुकिया लिसें विश्वकपय् छनोट जूगु टिमया ल्याः खुगू थ्यंगु दु । युरोपं जर्मनी व डेनमार्क छनोट जुइधुंकूगु दुसा दक्षिण अमेरिकां ब्राजिल छनोट जुइधुंकूगु दु । कतार ग्वसाः देय् जूगुलिं स्वतः छनोट जुइधुंकल ।

शनिवाः बहनी जूगु कासाय् फ्रान्सं कजाकिस्तानयात ८–० गोलं बुकूगु खः । फ्रान्सया केलियन एमबाप्पें प्यंगू गोल याःगु खःसा करिम बेन्जामा निगू व एन्टोनी ग्रीजम्यान व एड्रिन रोबिटं छगू छगू गोल याःगु खः । अथे हे बेल्जियमं इस्टोनियायात ३–१ गोलं बुकाः विश्वकपय् थाय् दयेकूगु खः । बेल्जियमया निंतिं क्रिस्टियन बेन्टेक, यान्निक कारास्को व थोर्गान हाजार्डं गोल याःगु खः । इस्टोनियाया निंतिं इरिक सोरगां छगू गोल याःगु खः ।

छनोट अन्तर्गत जूगु मेगु कासाय् वेल्सं बेलारुसयात ५–१ गोलं, फिनल्याण्डं बोस्निया एण्ड हर्जगोभिनायात ३–१ गोलं व टर्की जिब्राल्टारयात ६–० गोलं बुकल । अथे हे नेदरल्याण्ड्सं मोन्टेग्रो लिसे निगू निगू गोलया बराबरी म्हितल ।

सम्बन्धित बुखँ

LEAVE YOUR COMMENTS