येँ महानगरपाखें ज्ञानमालायात ग्वाहालि
येँ – येँ महानगरपालिकां ज्ञानमाला भजन खलः स्वयम्भूयात अक्षय कोषया निंतिं २० गू लख तका दां लःल्हाःगु दु । येँ महानगर प्रमुख विद्यासुन्दर शाक्यं ज्ञानमाला भजन खलः स्वयम्भूइ हे वनाः खलःया अध्यक्ष तीर्थनारायण महर्जनयात अक्षय कोष वापतया ध्यबा लःल्हानादीगु खः ।
येँ महानगर प्रमुख शाक्यं कोषया ध्यबा लःल्हानादिसें महानगरपालिकां सम्पदा, कला, संस्कृतिया संरक्षण यायेगु नीति दयेकाः उकथं हे ज्या याना वयाच्वंगु दु धयादिल । वय्कलं महानगरपालिकाय् आतक सम्पदा मर्मतया निंतिं वःगु छुं नं कथंया प्रस्तावयात लित छ्वयेगु ज्या याना मदु धासें सम्पदाया मर्मत, सम्भार, जीर्णोद्वा लगायत अमूर्त सम्पदा नं बचे यायेगु निंतिं महानगरं कुतः याना वयाच्वंगु दु धयादिल ।
भजन खलःयाके दुगु पुलांगु भजनत वितरण यायेमाःगु खँय् बः बियादिसें महानगर प्रमुख शाक्यं बुद्धवाणीयात जनमानसय् यंकं जीवित याना तयेगु निंतिं भजनया तःधंगु महत्व दु, उकिं ज्ञानमाला खलःयाके दुगु भजन संग्रहयात नेपालभाषाय् जक लिकुंका तयेगु मखसे नेपाःया मेमेगु भाय्नापं राष्ट्रिय व अन्तर्राष्ट्रिय भासं नं अनुवाद यानाः यंकेमाः धयादिल ।
२०७२ सालय् भुखाचं क्षति जूगु ज्ञानमाला भजन खलः, स्वयम्भूया भजन सतः सामान्यकथं पुनःनिर्माण यानाः न्हिथं भजन याना वयाच्वंगु खःसा छुं दँ न्ह्यः उगु भजन सतः मिं नयाः क्षति जूगु खः । क्षति जूगु उगु सतः पुरातत्व विभागं मेथाय् हे तयेयंकेगु कुतः नं याःगु खः । भजन सतः मेथाय् तये यंकेबलय् भजनया महत्व म्हो जुया वनीगु तायेका, साविकया हे थासय् सतः पुनःनिर्माण याःगु खः ।
येँ महानगरपालिकाया प्रवक्ता नापं १५ वडाअध्यक्ष ईश्वरमान डंगोलं भुखाचं व मिं नयाः क्षति जूगु सतः पुनःनिर्माणया निंतिं सवपक्षी सहलह लिपा उकियात मूर्त रुप बीत ताःलाःगु खँ कनादिल ।
खलःया नायः महर्जनं भजन खलः स्वयम्भूय च्वय् दुगुलिं ज्याथःजिथिपिं उगु थासय् तक वयाः भजवन न्यनेत थाकुगु धासें ज्येष्ठ नागरिकयात भजन न्यनेगु व स्वयेगु निंतिं व्यवस्था यानाबीत येँ महानगरयात इनाप यानादिल ।
ने.सं. १०५७ निसें ज्ञानमाला भजन खलः स्वयम्भूया न्हिथं भजन जुया वयाच्वंगु दु । थन गुगुं नं आन्दोलन, हडताल, निषेधाज्ञा थेंज्याःगु इलय् नं भजन जारी हे जुयाच्वंगु खलकं जानकारी बिउगु दु ।
कोषपाखें प्राप्त जुइगु ब्याज भजन खलकय् जुइगु ज्याझ्व व सांस्कृतिक गतिविधि संचालन यायेगु ज्याझ्वलय् जानकारी बिउगु दु । उगु इलय् महानगर प्रमुख शाक्यं देवकाजी महर्जन व वय्कःया छेँजःपिंसं तयार यानाः भजन खलःयात लःल्हाःगु बुद्ध मूर्तिया नं अनावरण यानादीगु खः ।
LEAVE YOUR COMMENTS