नेपालय् छगू मात्रा जक बिउसा गाःगु खाेप वइगु

येँ – अमेरिकां नेपाःयात कोभिड १९ विरुद्ध छगू मात्रा जक खोप काःसा गाःगु जोन्सन एण्ड जोन्सनया खोप छ्वया हयेत्यंगु सीदुगु दु । अमेरिकां जोन्सन एण्ड जोन्सनया हे खोप छ्वयाहये त्यनागु धयागु बारे स्पष्ट मधाःनिसां याकनं हे खोप हयेगु तयारी जुयाच्वंगु खँ धाःगु दु ।

नेपाःया निंतिं अमेरिकी राजदूतया प्रवक्ता एना रिचिं एलनं अमेरिकां नेपालय् याकनं छ्यलेफइ कथं अमेरिकी खोप हयेगु तयारी जुयाच्वंगु खँ धयादीगु दु । वय्कलं बिबिसीलिसे खँ ल्हासें सुरक्षित व प्रभावकारी रुपं नेपालय् खोप हयेत कानुनी व बन्दोवस्ती सम्बन्धी चुनौतियात फयाफक्व याकनं सम्बोधन यायेगु कुतः यानाच्वनागु खँ धयादीगु दु ।
प्रवक्ता एलनं जोन्सन एण्ड जोन्सनया हे खोप हयेगु स्पष्ट रुपं मधाःसां बिबिसी नेपाली सेवां अमेरिकां नेपाःयात छगू मात्रा जक बिउसा गाःगु खोप बीत्यंगु थःपिंत जानकारी वःगु खँ धाःगु दु ।

अमेरिकां आः थथें गुलि मात्रा खोप बिउगु धकाः नं धाःगु मदु, तर न्ह्यथनेबहः जुइक खोप बीगु धाःगु दु । अमेरिकां खोप हयेगु निंतिं गठन याःगु विज्ञ समितिं नेपाःयात खुगू लाख डोज जोन्सन एण्ड जोन्सनया खोप वयेत्यंगु खँ बिबिसीयात धाःगु दु ।

अमेरिकां बीत्यंगु थ्व खोप विश्वब्यापी खोप अभियान कोभ्याक्स मार्फत बीत्यंगु खः । अमेरिकी राष्ट्रपति जो बाइडेनं छुं न्हि न्ह्यव नेपाः लिसें एशिया प्रशान्त क्षेत्रया झिंन्हय्गू दे व प्यासिफिक आइल्यान्डयात निगू करोड ३०लाख मात्रा खोप बिइगु घोषणा यानादीगु खः । थ्व घोषणा कथं वंगु वालय् पाकिस्तान व बंगलादेशयात २५÷२५ लाख डोज खोप बीधुंकूगु दुसा आः नेपाःयात खोप छ्वयाहयेगु तयारी याःगु खः ।

बंगलादेश व पाकिस्तानयात अमेरिकां निगू मात्रा कायेमाःगु माेर्डना खोप बिउगु खःसा नेपाःयात धाःसा छगू मात्रा जक काःसा गाःगु खोप बीत्यंगु खः ।

नेपालं आःतकया दुने चीन व भारतं ४२ लाख ४८ हजार डोज कोरोनाविरुद्धया खोप हयेधुंकूगु दु । थुकी मध्ये चीनं १८ लाख व भारतं ११ लाख डोज अनुदान कथं बिउगु खःसा १०लाख डोज भारतं न्याना हःगु खः । अथेहे कोभ्याक्स अभियान अन्तर्गत नेपाःयात ३ लाख ४८ हजार डोज खोप वयेधुंकूगु दु ।

स्वास्थ्य मन्त्रालयया अधिकारीतय्सं नेपालय् जोन्सन एण्ड जोन्सनया खोप वःसां छुं समस्या मदुगु खँ धाःगु दु । स्वास्थ्य मन्त्रालयया सहप्रवक्ता डा. समीर कुमारी अधिकारीं डब्ल्यूएचओं मान्यता बियातःगु छुं नं खोप नेपाः हयेत समस्या मदुगु खँ धयादीगु दु । वय्कलं जोन्सनया खोप नेपालय् भण्डारण यायेत नं समस्या मदुगु खँ धयादीगु दु ।
थ्वहे दथुइ नेपालं चीनं ४० लाख डोज खोप न्यायेत्यंगु दु । थ्व खोप कायेत नेपाल वायुसेवा निगमया विमान बिहिवाः चीनपाखें वंगु दु ।