येँ–ख्वप वैकल्पिक सतक विस्तार शुरु

ख्वप – येँ व ख्वप स्वाइगु सिमानाया वैकल्पिक सतक विस्तार शुरु जूगु दु । थुपिं निगू जिल्ला स्वाइगु येँया जडीबुटीनिसें ख्वपया जगाति तक वनेगु वैकल्पिक सतक विस्तार यायेगु ज्या शुरु याःगु खः । उगु सतकखण्ड अन्तर्गत वैकल्पिक सतकया रुपय् दुगु पेप्सीकोला, पुलांगु थिमि, बहाखा बजारं मध्यपुर थिमि जुयाः ख्वपय् वनेगु खस्याङखुसुङ ताँ तकया सतक विस्तार यायेगु ज्या न्ह्याकूगु खः । करिब खुगू किलोमीटर ताःहाकःगु सतकय् दुइतर्फी यातायात संचालनय् समस्या वःगु धासें सतक विस्तार यायेगु ज्यायात न्ह्यःने यंकूगु खः ।

उगु सतकखण्डय् निखेरं यातायात संचालन यायेत समस्या वःगु नापं यातायात संचालन जुइगु इलय् सतक जाम जुइगु क्रम नं अप्वयेवं आः वयाः सतक विस्तारयात तीव्रता बियाहःगु खः । कुल ५४ करोडया लागतय् डिभिजन सतक ज्याकुथिं सतक विस्तारया ज्या न्ह्याकूगु खःसा सतक विस्तारया झ्वलय् २० मिटर फुटपाथयात नं तब्या यायेगु योजना दुगु मध्यपुर थिमि नगरपालिकाया प्रमुख मदनसुन्दर श्रेष्ठं कनादीगु दु ।
सतक विस्तारया शिलान्यास प्रतिनिधिसभा सदस्य महेश बस्नेतं यानादीगु खः ।

सतक विस्तारया शिलान्यासलिसें ख्वप वनेगु छगूयां छगू जक वैकल्पिक मार्गया रुपय् दुगु थुगु सतक विस्तारं मध्यपुर थिमिया विकासय् तःधंगु तिबः जू वनीगु दावी वय्कलं यानादीगु दु । उगु सतकखण्डय् सतक विस्तार यायेगु ज्या जूसां परियोजना अन्तर्गत सतक विस्तार जूगु सतकया जःखः च्वंगु पुलांगु छेँ धाःसा मथुनीगु जूगु दु ।

सतक विस्तार अन्तर्गत लाःगु थिमिया बहाखा बजारय् दँ दँ न्ह्यवंनिसेंया आपालं पुलांगु छेँ दुगु व उकियात थुनेगु योजना मदुगु नापं छेँ थुने हे माःगु अवस्था वल धाःसा सरकारयाके उचित क्षतिपूर्ति माग यानाः जक सतक विस्तार यायेगु नगरप्रमुख श्रेष्ठं कनादीगु दु । थ्व हे झ्वलय् सूर्यविनायक नगरपालिका अन्तर्गत वडा नं. २ व ३ य् लाःगु बालकोटनिसें मध्यपुर थिमि तकया लँ नं विस्तार यायेगु ज्या शुरु जूगु दु । थुगु सतक स्थानीयतय् विरोध व विवादया कारणं वंगु प्यदँ न्ह्यवंनिसें विस्तार जुइ फयाच्वंगु खः ।